Aizawl: MNF Vice President leh Leader of Opposition Lalchhandama Ralte-in Thawhtannia MNF Hnam Run inkhawmah thusawiin, Chief Minister Lalduhoma chu Lungleiah thu thar thehdarhtute hmaah dawt tam tak sawiah a puh.
Mizoram State University dinna tur chungchangah Chief Minister-in Lunglei press mite hmaah dawt tam tak sawiah puhin Lalchhandama Ralte chuan, MNF sorkar khan State University atan Cabinet chuan July 31, 2023 khan an rel a. Aug 16, 2025-ah Bill Drafting Committee din a ni tiin, “ZPM sorkar thar chuan drafting committee hma a laktir a. March 4, 2025-ah bill chu pass a ni ta a. MNF ministry kha draft stage-ah kan awm a, a hmun tur engmah a la awm lo. A hmunhma dahtu dik tak chu anmahni (ZPM sorkar) an ni a, Aizawl-a dah tur an ti. Kan chief minister tih vek a ni a, heti lam (Aizawl)-ah ‘kan tih’ a ti a, sawti lam (Lunglei)-ah MNF tih a ti thung,” a ti.
Lalchhandama Ralte chuan, “Cluster institution-te kha MNF sorkar thlan tiin a sawi a. Cluster college/institute order hi Oct 10, 2025 khan a chhuak chauh. CM hian chawpchilhin dawt a sawi hnem lutuk,” tia sawiin, H&TE minister hovin chak takin hma an la a, college an notify pawh minister-in a tlawh vek tawh bawk. Nov 20, 2025-a Lungleia University dah tur tih a puan lai khan Aizawla university hmunhma tura ruatah an la hnatlang luih luih tih a sawi.
Leader of Opposition chuan Assembly House-a University bill an sawi khan ZPM MLA paliten Lungleia dah an dil miah lo va, Aizawla dah an thlawp thu leh MZSU Bill (Aizawl station) pass-tu nih an inchhuan thute an sawi a. Lungleiah awm rawh se titu kha Opposition bench zawk an nih thu sawiin, ZPM MLA pakhatmah khan Lungleia dah an sawi lo tih a sawi.
Chief minister chu dictator ang maia, ram lu berin a duh dan a puang mai hi HTE minister thluak fim tak hian a ngaihtuah nawn leh dawn em tih chu an zawhna a nih thu sawiin Lalchhandama Ralte chuan, “University hi ngaihtuahna fim taka din tur a ni. Kum thar bill-ah rawn pu lut rawh se kan lo pass pui ang,” tiin, zirna chu politicize lo turin a ngen tih a sawi a. Lungleia State University dah tumna ni ‘tha ba rulhna’ mai mai ni lovin, an duh tak tak a nih chuan ngaihtuahna fim takin ti se, an thlawp dawn tih a sawi.