Delhi-a boruak bawlhhlawh nasa lutuk avangin sorkar leh mi mal pisaa thawkte chu a zahve in atanga hna thawka a zahve dang pisa kai tura tih an ni a. Commission for Air Quality Management (CAQM)-in a duan, Graded Response Action Plan level 3 (GRAP-3) inkhuahkhirhna hman tan a ni ta bawk.
Delhi sorkar hian boruak bawlhhlawh lutuk avang hian sikulte chu an zirlaite pawna infiamtir a phalsak lo sa tawh bawk.
Thawhlehni kha Guru Tegh Bahadur Shaheedi Purab vawi 350-na a nih avangin sorkar chuan Delhi-ah chawlh a puang a, pisa kai hi an awm mang lo sa thung.
Delhi-ah hian GRAP level hrang hrang kalpui niin hei hi boruak dinhmun aziria inkhuahkhirhna kalpui thin a ni a, tun hnaiah thlasik laia boruak a chhiat zual avanga duan a ni.
CAQM hian National Capital Region (NCR)-a boruak dinhmun, average air quality index (AQI) leh khaw awm dan azirin bakah agency dang leh thuneitute rawn chungin inkhuahkhirhna level hrang hrang hi a kalpui thin.
Delhi sorkar hian Inrinni khan mi mal pisate chu a zahve chauh pisa kai tur leh a danbg zawng chu in atanga hna thawk turin a lo ti tawh a, hei hi GRAP-3 hman tanna bul a ni.
GRAP 1 inkhuahkhirhna hi AQI 201 leh 300 inkar a nihin hman thin a ni a, GRAP 2 chu 301 leh 400 inkarah leh GRAP 3 chu 401 leh 450 inkarah hman thin a ni a. GRAP 4 khuahkhirhna chu AQI-in 451 a tlin atangin hman thin a ni.
AQI hi Thawhtanni khan chawhrualin 382 a ni a, monitoring station 15 huam chhungah erawh 400 a pel hlawm thung a ni.
Delhi Environment Minister Manjinder Singh Sirsa chuan sorkar chuan GRAP 3 hnuaia boruak bawlhhlawh lutuk tihziaawmna tura hmalak theihna awm zawng zawng chu ‘tih tak zet leh chhun zan zawmin an thawk dawn’ tih a sawi.
Sorkar hian bawlhhlawh leh ran ek hal lo turin mipui a chah a, vaivut khu awm theihna siam lo tur leh chutiang ti ang chi chu Green Delhi app kaltlanga hriattir zel turin a ti.