Central YMA hruaitute chuan khawpui chhung veng hrang hrang Local Council (LC) te kawmin, ILP chungchang leh ruihhlo do chungchanga thawhho dan tur hrang hrang an sawipui a, rah tha a chhuah ngei pawh beisei teh ang.
An inkawmnaah hian thawhhona tha an neih theihna tur leh kawng hrang hranga inpuihtawn dan turte sawi a ni a, heng an sawi hrang hrangte hi mahni veng huamchhung theuha an kengkawh tha a nih chuan kan khawpui pawh hi a thianghlimin, a nuam zual ngei ang.
Hmasawnna kawng hrang hrangin kan tawng chho zel a, hnamdang pawhin min chiah piah nasa chho zel bawk. Kan ram hi hnamdangten dan dik tak hmanga an tlawhpawh ngai leh phalna neia kan rama luh ngai a ni tih hi a mi chengte hian kan hriat zual a ngai a, sumdawnna kawng thleng hian kan inven a, hnamdangte laka kan thikthu kan tihchhiat hi a tul fo.
Ruihhlo a hluar a, kan thlalaite nasa takin a nghaisa a, a lehlamah hnamdang lo lut an tam telh telh bawk. Hengah te hian pawl mal ngawta hmalak theih a ni lo a, Central YMA in theihtawpa hmalak a tumna kawngah hian khawpui chhung vengtin local council te nen hian thawkhoin, inpui tawn se la, kan ram hi i humhalhin, kan dan neihsa tha tak hmang hian i inveng uluk zual sauh sauh teh ang u.