Las Vegas Grand Prix-ah Red Bull driver Max Verstappen a chak ber a, a elpui a elpui McLaren driver pahnih an disqualify avangin F1 title humhim thei turin beiseina a neih san phah.
Inrinni zan, India ramah chawlhni zing khan Las Vegas kawtthlerah intlansiakin driver championship-a hmahruaitu Lando Norris chuan a hmasa ber atangin bul a tan a, pahnihnaah Verstappen dingin champion thei pathum zinga mi Oscas Piastri chu pangana atangin a tlan chhuak ve thung a; tlan chhuah tirah McLaren khalhtu Norris che fuh lovin a kual zau a, Verstappen chuan lehpelin a tawp thlengin derthawng lovin hma a hruai tluan a, tun season-a a vawi ruk nan a chak a ni.
Pahnihnaah Norris thlengin team khata a awmpui Piastri chu palina a ni ve thung a, mahse, an endik hnuah McLaren car-in dan a bawhchhia a, dan phal baka a chhuat an tihhniam avangin he intlansiak bik atang hian hnawhchhuah an ni a, point khat mah an hmuh belh ta lo a ni.
Norris leh Piastri an hrem hnuah Mercedes driver pahnihin dawhsan an luah phah a, George Russell chu pahnihn a niin a kawppui Kimi Antonelli chu pathumnaah a awm.
A elpui driver pahnihin point an hmuh loh laiin Verstappen chuan point 25 a neih belh a, chuti chungin tlan tur pahnih an la neihah British driver Norris chuan hma a la hruai zui zel a, Piastri leh Verstappen te point inzat chiahin point 24-in hmahruaitu aiin an hniam a, an hmabakah driver pakhat tan point 58 a la hmuh theih a, F1 title inchuhna boruak a nung thar leh a ni.