Aizawl: MNF Senior Vice President Dr R Lalthangliana’n ZPM sorkar chu mipuiin an enchhin a, an nihna an chian tawh avangin kil tin atangin an hnawl mek tih a sawi.
LADC inthlanpui neih tura campaign-a Cheural, Lungtian-1, Lungtian-11, Rawlbuk, Lungpher, Siachangkawn, Vawmbuk, Bualpui NG leh Lungzarhtum khuate tlawh a, Thawhlehnia an party hruaitute nen an inkawmnaah Dampa bialtu MLA Dr R Lalthangliana chuan, sorkarna chelh mek ZPM chu kum hnih em pawh an sorkar hmain, inthlan a piangin hniam lam an pan zel tih a sawi.
Dr R Lalthangliana chuan ZPM chu an sorkar tirh, an vung vanglai takin nikumah Sinlung Hills Council General Election-ah nasa takin an tla a, hneh takin MNF kan an tling tih sawiin, “An thuneihnain Aizawla local council leh VC inthlan an pawt hnai lui a, an boruak that lai tak nia an hriatah inthlan an buatsaih a. Hetah hian sorkar kal tawhte anglo takin nasa takin an hniam rawih rawih,” tiin, Congress leh MNF an sorkar lai khan hetiang inthlanah hian nasa takin ruling an tling zel thin tih a sawi.
MNF leh Congress an sorkar thin lai khan kum hnih khat lekah mipuiin tun ang em em hian an nin an sawi ngailo tih sawiin MNF Senior Vice President chuan, “ZPM sorkar an ninna chhan ber chu, thiltih theihloh tawp ti turin mipuiah inthlan laiin an inzuar nasa a, mipuiin an enchhin a, an nihna an chiang ta hle a, mipuiin kiltin atangin an hnawl mek,” tiin, kum 2028 MLA General Election-ah chuan mipuiin MNF sorkar thar an piantir leh ngei dawn avangin, LADC-ah pawh MNF leh a thawhpui MDC official candidate-te hi lo vote vek turin a ngen a ni.