Chief Minister Lalduhoma’n sumdawngte tana hmalak awlsam tur zawngin industry leh investment policy siam that a nih tawh thu sawiin, sawhthing mai ni lo, thlai thar dang lei leh sawngbawl kawngah pawh Mizoram sorkar chu investor-te tan a inhawng tih a sawi.
Mizoram sorkar leh NITI Aayog tangkawpin Mizoram sawhthing tharchhuah pung chho mek chungchanga inrawnkhawmna, ‘Stakeholders Consultation for Mizoram Ginger Produce’ chu Vigyan Bhawan, New Delhi-ah Thawhtanni khan an neih a. He inrawnkhawmna hi Mizorama kuthnathawktute tharchhuah sawhthing lei leh hralh kawnga harsatna sut kian dan tur sawihona leh market tha zawk, loneituten an hlawkpui lehzual tur dapchhuah tumna a ni.
Inrawnkhawmnaah hian Mizoram chhunga sawhthing sawngbawlna tha zawk neih leh India ram chhung leh khawvel hmun zau zawka sawhthing thawnchhuah dan tur bakah, kuthnathawktu pawl (FPOs), industry leh sumdawng (entrepreneur)-te tana kalphung tha zawk leh sawhthing chin leh hralh kawnga Strategic Action Plan te pawh an sawi.
He hun hmanpuitu, Chief Minister Lalduhoma chuan Mizoram chu tun hnai kum hnih vel chhungin India rama sawhthing tharchhuak tam ber pawlah a inhlangkai a. Mizoram tharchhuahte hi hmun danga mite aiin a quality pawh a sang deuh zawka hriat a nih thu a sawi.
Chief Minister chuan sawhthing chingtute tan Mizoram sorkar chuan kg khat zelah support price Rs. 50 a pe mek a, kuthnathawktute tanpui duhna thinlung pu, hlawhtlin ngei tum sumdawngte chu Mizoram sorkarin lawm takin a thawhpui thei reng tih a sawi a. Sumdawngte tana hmalak awlsam tur zawnga sorkarin industry leh investment policy a siamthat tawh thu a sawi a. Sawhthing mai ni lo, thlai thar dang lei leh sawngbawl kawngah pawh Mizoram sorkar chu investor-te tan an inhawng a. Inrawmkhawmnaa telpuitu sumdawngte hi December 5-6, 2025-a Aizawla neih tur, sawhthing Buyer-Seller Meet-a tel vek turin a sawm.
Inrawnkhawmna hi hun chhawng thuma kalpui a ni a, a chhawng khatna chu NITI Aayog Member Dr. VK Paul chuan a kaihruai a. Agriculture & Farmers Welfare Special Secretary Ramdinliani chuan Mizoram sorkar aiawhin Mizoram dinhmun tlangpui a sawi fiah a. A chhawng hnihnaah Industry, FPO leh Academia-te nen Mizorama sawhthing tharchhuah hralhna leh sawngbawl zui kawnga hmasawnna tur leh insumdawn tawnna tur te sawiho a ni a. A chhawng thumnaah Mizoram leh central sorkara mi pawimawhten thu an sawi bawk.
NITI Aayog-in rawtna an siam danin, Mizoram chu Ginger capital of India tih ni se, sawhthingte chu organic a nih zel theih nan hmalak zui zel ni se, technology sang zawk nena a processing lam kalpui dan kawng zawn ni se, ram chhung chauh ni lovin ram pawna thawn chhuah kawngah pawh hmalak ni se, an ti a. Heng rawtnate chu chak taka bawhzui zel turin thutlukna an siam a ni.