Aizawl: MNF Treasurer Lalruatkima chuan ZPM-in Zoram an hruai danah mipuite an beidawng niin a sawi.
LADC inthlan campaign-a Lawngtlai East MLA bial chhunga Sangai, Sentetfiang leh Cheural khuate Nilainia a tlawhnaah MNF Treasurer chuan, ZPM sorkar chuan an intiamna zawng zawng deuh thaw an tihlawhtling lo tih sawiin, “Kan ti lo vang, an tih an ti nasa em em a. Chhiah leh thil man hrang hrang tisangin mipuite min hrek riltam mek a, min sawrfu mek zel a ni. ZPM-in Zoram an hruai danah mipuite an beidawng,” a ti.
Tun thlenga LADC sorkar hnathawk hlawh tur ZPM sorkar-in a la pe lo chu pawi an tih thu sawiin Lalruatkima chuan, “Sorkar hnathawkin pangngai taka hlawh an lak hi an chanvo a ni. Hmanni maiah Central sorkar hnuaiah CSS te sorkar lakah an nuar a. Sorkar hnathawk ‘right to protest’ an neih mausam sakin an ni sarih hlawh lai an cut sak a, a mak hle,” tiin, MNF chu la sorkar se an cut sak loh tur thu a sawi.
MNF chu tlang tin hmun tinah an lungrual a, an inlungrualna chu Pathianin mal a sawm a, mipuite thinlung a hneh a, inthlan an hmachhawn chhohah an chak ta zawt zawt mai tih sawiin, “Tun LADC inthlanah pawh hian sorkar nghet siam turin kan tlin leh ngei kan ring nghet tlat a ni,” a ti bawk.