Premier League a pan hmaa winger chak tak lak luh inchuhna kawnga fawng vuantu ber pakhat sawi danin Mykhailo Mudryk-a chuan Chelsea aiin Arsenal zawm a duh zawk tih a sawi.
January, 2023-ah khan Arsenal leh Chelsea chuan Ukraine star hi Shakhtar Donetsk atangin lak luh an tum ve ve a. Chelsea hian £ maktaduai 88 thleng pung thei tura inremna an siampui hnuah an chang ta zawk.
Shakhtar Director of Football Darijo Srna chu inremna kawngah a inrawlh thuk hle a, Chelsea a buaipui a, club General Director Serhiy Palkin-a’n Arsenal a dawr thung a. Tun thlenga he nihna la chelh zui, Croatia international hlui hian Mikel Arteta nen an inbiak hnuah Mudryk-a’n Arsenal hmachhawp leh thil tumte a duh hle tih a puangzar.
Palkin-a chuan, “Misha-a’n Arteta a bia a, keiin Chelsea coach ka bia a. Khatih hun lai phei kha chuan Arteta bula kal a duh zawk a ni. Mahse, club lamin player hralh leh hralh loh thuah thuthlukna an siam tur a ni a. Club-in Chelsea nen inremna an hmu tih a hnenah kan hrilh a. Tichuan, nangmahin thuthlukna i siam a ngai tawh a ni. I insawn duh a nih chuan Chelsea-ah i kal dawn nge, Arsenal lamin chutiang phei chu an rawn pe ve dawn, a nih loh chuan Shakhtar-ah i awm zui rih ang,” a ti.
Chelsea-in an chhuhsak hnuah Arsenal tantute an lungni lo hle a, Ukraine winger hi an inhmachhawn tum khan Arsenal tantu pakhat chuan a mit takah laser pen-in a chhun a, an man phah hial a ni.
Mudryk-a hian London khawpuiah bul a tan tha lo hle a, a chet that tawk loh avangin elsenna a tawk fo a. Chu mi hnuah Ukraine tana a khelh tuma danin a phal loh ‘meldonium’ a hmang tih an hmuh chhuah tak avangin December, 2024 khan hrem a ni.
Kumin kum tir lamah khan kum li chhung an hremna chu a khing hlawhtling a, nipui bazarah khan Tottenham chu loan-in a zawm ta a ni.