Core Committee on Thenzawl Peace City chu an chairman, Lalduhoma, Chief Minister hovin an thukhawm a, Thenzawl Peace City-a Greenfield City siam dan tur ruahmanna an pawm.
Nilainia CM Conference Hall-a thutkhawmah Lalmalsawma Pachuau, Secretary, UD&PA chuan SASCI-ah Urban Planning Reforms hnuaiah tinzawn bik neia Greenfield City kalpui theihna component Rs. vbc 150 vel hmuh theihna a awm a, inelna atanga hmuh tur a ni.
Thenzawl Peace City huam chhunga tourism leh AH&Vety department ramte behchhanin he fund hmuh theihna tur Greenfield City proposal hi duan a nih thu a sawi.
Thenzawl Peace City Master Plan siamtu tura thlan, IPE Global mi thiamten Greenfield City proposal hi a lem nena entirin chipchiar takin an sawi fiah a. An ruahmanna siam hi committee hian a pawmsak a, Ministry of Housing & Urban Affairs-ah thehluh a ni ang.
Sorkar thuchhuah chuan Thenzawl Peace City Master Plan hi IPE Global ten chak takin an buaipui mek thu a tar lang.