Aizawl: MNF Sr. Vice President Dr R Lalthangliana chuan Chief Minister Special pakage leh handholding policy chu innghahna tlak a nih loh thu sawiin, ZPM sorkar chu hmunphiah leh sawhthing leiah hlawhchhamah a puh.
LADC inthlanpui neih tura campaign-a Ningania Vathuampui, Hmunnuam, Diltlang South leh Chawngte ‘P’ a tlawhnaah Dr R Lalthangliana chuan, ZPM-in Dampa bial by-election leh LADC inthlanah pawh an campaign auhla leh mipui an vehthlemna ber, Chief Minister Special Package cheng nuai khat pek tih leh hand holding policy chu mipui tan innghahna tlak a nih loh thu sawiin, “Kum hnih dawn ZPM sorkarah hian Dampa bial Silsuri-ah pawh CM Special package an tih hi mi pakhat chauh la pek a ni. Sum pek tur sorkarin a nei lo a, innghahna tlak a ni lo,” a ti.
ZPM-in handholding scheme-a loan an aupui pawh mi rethei zawkte dawmkanna tur aia an phurrit chang thei, rulh leh ngai, pung tam tak nena leiba insiamna a nih theih thu a sawi a. “Mihring sing chuangin an dil tawh laiin bank chuan mi 200 awrh chauh loan an la pe a, sorkarin a thlan mi 700 chuang atangin mi 100 chuang bank-in an hnawl tawh,” tiin sorkarin a nawrna avangin bank institution tlem zawkin loan pe hram a, loan tha mi anga an zawrh mek hi mipui vehthlemna hmanrua, rulh theih loh chuan phurrit, jail bang zut theih a ni tih a sawi.
MNF Sr. vice president chuan, “Sorkar lai mekin kuthnathawktute a enkawl dan leh an hlawhchham dan kan hmu tawh a. Hmunphiah chingtute rumna kan hria a, hmanni lawk khan sawhthing chingtute sum tur Rs vbc 5 vel tihchingpen thu kan hre leh a, an la batsak nual bawk niin ka hria. Chuvangin, ZPM sorkarah kuthnathawktute tan beisei tur thar engmah a awm tawh lo,” a ti bawk.