Rev. C. Rosiama chu nimin khan Senate of Serampore Convocation-ah Senate chawimawina sang ber, doctoral degree – Doctor of Divinity (honoris causa) hlan a ni.
Rev. C. Rosiama hi Christian Counseling lamah Mizo zinga M. Th hmasa ber niin, Mizoram Presbyterian Kohhranah kum 33 chhung pastor hna thawkin, rawng a bawl chhung hian chanvo hrang hrang – Bial, Presbytery, Synod leh PCI General Assembly thlengin rawngbawlna hna a chelh kim hle.
Ram chhunga Presbyterian kohhrana hna (post) hrang hrang a chelh kim viau bakah, Synod Puipa nihna hrang hrang a chelh kim vek a, Aizawl Theological College-ah Principal (Acting) hna pawh a lo thawk tawh a. Family Guidance & Counseling Centre bul tantu a ni.
Bible Society rawngbawlnaah pawh Rev. C. Rosiama hian India ram pumah Third Vice President hna chelh tawhin, Translation Chairman a lo ni tawh a, a pension hnu thlengin Bible lehlin lamah a inhmang.
Tunah hian Aizawl Auxiliary-ah CL revision-ah chairman ni mekin, Chief Translator a ni nghe nghe.
Lehkhabu, article leh thuziak dang engemawzat a nei tawh a. Kohhran inrelbawlna mumal leh fel duh mi niin, he lamah hian sulhnu engemawzah a nei a, tun thlengin hmun hrang hranga thusawia sawm a hlawh hle a. Heng bakah hian sorkar din Ethics Committee-ah Chairman a lo ni tawh bawk a. Pathian rawngbawlna kawnga theihtawp a chhuah avang hian he chawimawina hi hlan a ni.