Aizawl: Kolasib Fast Track Court-in hmeichhe naupang khuaikhemtu putar kum 67 mi chu hrehawm taka kum 10 chhung lung in tang turin a hrem.
Kolasib Fast Track Court-in thiam loh a chantir hi Vanlalruata (67), Kolasib Venglai UPC Mual a ni a, kum 2019 khan veng pakhata hmeichhe naupang kum 8 mi chuan a serh a nat thu leh putar pakhatin a serh a khawihsak thu a sawi avangin, hmeichhe naupang pa chuan Kolasib Police Station-ah FIR a theh lut a. He thil hi Kolasib Police-in chhui zui nghalin, pawi khawihtua puh Vanlalruata hi an man nghal a ni.
Hmeichhe naupang hi doctor-in a endikna atang mipat hmeichhiatna lam hawia khawih chingpen ngei a ni tih hriat a ni a, Police-in an chhui chianna report an theh luh behchhanin Kolasib Fast Track Court chuan pawikhawihtu hi November ni 17, 2021 khan thiam loh chantirin, kum 10 chhung lung in tang tur leh Rs 5,000 chawi turin a lo hrem tawh a ni.
Court thurem danah hian Vanlalruata chu lungawi lo vin, Gauhati High Court-ah a zualko leh a, Gauhati High Court, Aizawl Bench chuan thubuai hi a bul atanga rel tha leh tura a hriattir angin, Kolasib Fast Track Court Judge, R. Vanlalena chuan thubuai hi a ngaihtuah tha leh a, thubuai chhuitu case IO leh naupang endiktu doctor bakah thuhretu hrang hrang thusawi atangin, Vanlalruata hian hmeichhe naupang hi a khawih chingpen ngei tih a finfiah nawn a. Hrehawm taka kum 10 chhung lung in tang tur leh Rs 7,000 chawi turin a hrem zui a ni.