Larsap General Vijay Kumar Singh-a’n India International Science Festival 2025 neih tur khuhhawnna hun nimin khan a hmanpui.
December 6-9, 2025 chhunga Chandigarh-a neih tur, India International Science Festival 2025 khuhhawnna hi Meteorological Centre, Aizawlah neih niin, he hun hmanpuitu larsap chuan India International Science Festival neih a ni leh tur chu lawmawm a tih thu a sawi a. Tunah chuan India chu khaw awm dan tur hrilhlawk kawnga hmahruaitu leh ram tam takte ngaihchan a nih thu a sawi a. Mahni pual satellite siam chhuah mai bakah a awmna tur orbit-a dah thei an ni chu chhuanawm tiin, India chu khawvel puma nikhata starts-up tan thar ngah ber leh, tun dinhmuna nei tam ber pahnihna a nih thu a sawi.
Larsap chuan science tel lova khawsak leh hmasawn tura hma lam pan a harsat thu sawiin, zirlai kalkhawmte chu science ngaihven zual deuh deuh tur leh ram tana thil thar tha zawk ngaihtuah chhuah tum turin leh IISF atanga hlawkna hmuh tum turin a chah a. IISF chu Kût mai nilo, khawvel huap beihpui thlakna pawimawh tak – zirbingmi, zirlai, entrepreneur, thil thar thlen duhtu leh mipui nawlpuite hmun khata phuarkhawmtu a nih thu a sawi.
IISF 2025 chuan hmasawnna tha zawk siamin helam ngaihvenna thar Mizoramah thlen se a duh thu sawiin, India ram hmasawn, chak leh intodelh siam nana a tangkai ngei a beisei thu a sawi bawk.
Inkhawmah hian Directorate of Science & Technology Principal Scientific Officer K. Lalrammuana leh Sudheer Kumar Dwivedi, Director & Head, Meteorological Centre, Aizawl-te thu an sawi bawk.