Indian parliament thlasik thutkhawm chu Thawhtanni hian tan a ni dawn a, sorkar chuan vantlang hman tur nuclear tha chakna siam chhuahna mi mal kuta dah dan tur chhawp chhuah a tum laiin eptute chuan state leh union territory 12-a electoral roll ennawn kal mek titawp tura sorkar kar an tum ve dawn.
Chawlhkar thum awh tur thutkhawm hi BJP kaihhruai NDA tangrualin Bihar assembly inthlana hnehna an chan zawh hlim niin fur thutkhawma rorel mumal theih loh ang kha thlentir loh an tum.
Thutkhawm vawi 15 awm tura duana mi mal kuta nuclear tha chakna siam chhuahna dah tumna, ‘The Atomic Energy Bill, 2025’ bakah hian sorkar chuan Higher Education Commission of India Bill leh sawiho tur lian pariat a chhawp chhuak dawn bawk.
Hetih lai hian sorkar hi Chandigarh UT-ah president-in thuneihna sang zawk a neih theihna tur bill erawh chu an thawhpuite atanga pawha duh lohna a tam avangin erawh hnuh kir leh an tum nia hriat a ni.
Parliamentary Affairs Minister Kiren Rijiju-a chuan session lo awm tur inbuatsaih nen Pathianni khan political party hrang hrang hruaitute chu rorel inkhawm tluang taka neih a nih theih nan a thutkhawmpui.
Session-ah hian eptute chuan Special Intensive Revision of Rolls (SIR) kalpui mek bakah ram khawpui bera boruak bawlhhlawh lutuk chu an sawi chhuah ngei rin a n.
Sorkarin dana hman tura a chhawp chhuah zinga mi, Higher Education Commission of India Bill hi university leh zirna in sang zawkte enkawltu tur commission dina mahni kea an dinna tur leh mahnia ro an inrel theihna tur kawng hawnna tur a ni.
National Highways (Amendment) Bill pawh pharh tura ruahman niin national highway-te rang zawka sial a nih theih nana ram lak a awlsam zawkna tura tih a ni.
Corporate Laws (Amendment) Bill, 2025 pharh tum ni bawkin hei hi Companies Act, 2013 leh LLP Act, 2008 thlaka awlsam zawka sumdawnna kalpui a nih theihna tur a ni.
Securities Markets Code Bill (SMC), 2025 pharh tum chu Securities & Exchange Board of India Act, 1992, Depositories Act, 1996 leh Securities Contracts (Regulation) Act, 1956 hman thinte khaikhawma rualkhai zawka Securities Markets Code hman a nih theihna tura duan a ni.
Session hmasaa bill pharh tawh pahnih pawh tun tumah hian pawm tuma sawiho leh a ni bawk.
Thlasik thutkhawm hi December 19-a tawp tura duan niin thutkhawm vawi 15 awm tura ruahman a ni.