Cyclone-in a ken tel ruah sur nasa avanga Indonesia-a tui lian leh lei mina thi chu mi 600 chuang an tling ta a, chhanchhuah hna thawktuten kawng tihtlang hna an thawk nghal mek a. Khaw awm danina zir tan a, chhiatna thlen dan dik tak hriat mek zel niin Asia chhimchhak ram eng emaw zatah khuarel chhiatnaa thi hi mi 800 dawn an ni tawh.
Indonesia, Malaysia leh Thailand chu Malacca Strait-a insiam khat tak, tropical storm thawkin ruah leh thli a ken tel hian chhiatna a thlen nasa a, a tuartute hmun thlen pawh lei min leh tui lian avangin thlen mai a harsa bawk.
Thailand-ah hian mi 176 vel thi awm tawhin Malaysia-ah mi pathum an thi tawh a. Indonesia-ah mi 604 thi awm tawhin chin hriat loh mi 464 an la awm mek bawk niin sorkarin a puang.
Thawhtanni atang khan khua a tha tawh a, Indonesia-a West Sumatra thliarkara Palembayan khua mite chuan chirh, thing tlu leh kawng ping then hna an thawk tan a. Mi thenkhat chuan an in chhiaa lehkha pawimawh awmte an hai bawk.
Mi thenkhatin chinhriat lohva awmte zawn hna an thawk bawk a. Hetih lai hian hmun thenkhatah chuan khup thleng chirh dai ngai a la awm.
Sorkar chuan kawng, lei leh inbiakpawhna chhiate siam hna a thawk nghal a. Indonesia-ah hian in 28,000 chuang chhiain mi maktaduai 1.5 velin an tuar niin disaster agency chuan a sawi.
Indonesian President Prabowo Subianto-a’n Thawhtanni khan a tuar na zual province pathum tlawhin mi chengten huaisen taka chhiatna thleng an tuar a hmu chu lawmawm a tih thu a sawi.
Ram pathumin hetiang chhiatna an tawh hma lawk khan Asia chhimchhakah tho thla hmasa khan typhoon thawkin Philippines leh Vietnam-ah tui lian leh chhiatna a thlen nasa hle.
Scientist-te chuan khawvel lum zel avangin khaw awm dan uchuak tak tak hi a tam telh telh dawn niin an sawi.
Malaysia-ah chuan mi 11,600 vel an chenna in atangin hmun dangah sawn chhuah an la awm mek niin disaster agency chuan sawiin tui lian thawh hnihna leh thumna an tuar mek tih an sawi.
Thailand-ah mi 176 thi awm tawhin chhim lam province pariata mi maktaduai thum chuangin an tuar a. Sipaiten damdawi ina damlo na zual chu hmun dangah an sawn bakah tui lian tuarte chhawmdawl hna an thawk.
A tuar na ber chu Songkhla province niin mi 138 thi an awm tawh a, heth lai hian tui lakna chhia 85% an siam tha leh tawh a, Nilainiah an tihthat hman vek an inbeisei.
Prime Minister Anutin Charnvirakul-a chuan ni sarih chhungin an in chhuahsante hawtir hman vek turin tan an la tih a sawi.