Manchester City Chairman Khaldoon Al-Mubarak-a chuan Premier League nena an inkhin chungchangah sawi châk tak tak a neih thu a sawi a; mahse, an club thubuai 115 chungchanga thutlukna a chhuah hma loh chu nghah a ngaih thu a sawi thung.
February, 2023 khan Premier League chuan Manchester City hian sum leh pai hman dan (financial rules) an bawhchhia tiin thubuai 115-ah an hek a. He thubuai hi December, 2024 khan ngaihtuah zawh tawh ni mah se thla 18 zet a liam hnuah pawh thutlukna mumal a la awm lo a ni.
“Ka thupui ngai bawk kha ka sawi leh ang. Thutlukna a chhuah hma loh chuan sawi theih vak ka nei lo,” tiin Khaldoon chuan a sawi.
“Thutlukna a chhuah hunah chuan min ring rawh u, kum thum chhung ka lo sawi châk tawh zawng zawng kha ka sawi vek ang,” a ti.
Thubuai 115 chungchangah Manchester City hian thiam lohna an neih loh thu an sawi ve reng a; mahse, thiam loh an chan palh chuan hremna nasa tak an tawk thei a, Premier League atanga hnawhchhuah hial pawh an hmachhawn thei a ni.
Heti chung hian Khaldoon-a chuan a neitu, Sheikh Mansour-a’n City hi kalsan a tum lo hle tih a sawi a ni.
“Hralh tumna a awm lo. Tihlen zel chauh kan tum a ni, a chhan chu he sumdawnna hi a la thang zel dawn tih kan hria a, neih reng tlak thil a ni. Football leh intihhlimna a ni a. Tunlai khawvel inthlak danglam zelah hian mite ngaihsak zawng thlak mah se, infiamna hi chu a hmun ngai bawkah a awm reng a ni,” tiin a sawi.