- Lalremliana Pachuau
Mahatma Gandhi khân, “Khawvelah danglamna i thlentir duh a nih chuan, nangmahah bultan rawh” tih thu ropui a lo sawi tawh a. Tun huna Zoram Politik boruak han thlir hian, mi thil tha tih fak theih miah lohna thlipui tleh hum humin, miin hmasawnna hna an thawh apiang sawi nawi tumna leh, mahni tih ang riaka lo chhuah tum tlatna, Kristianna zia pakhatmah hmuh tur awm lova mi dang selna hlir, opposition leh mipuite atangin kan hmu mawlh mawlh mai a nih hi.
ICFAI lamin Dampa Inthlan thlir letna hun an hmannaah khân, ‘Mipuiin ZPM an tehfung bera chu an intiamna an tih hlawhtlin leh tlin lovah zel a ni’ tia mi thiam pakhat sawi kha a dik zet mai. ZPM lam khân inthlannaa hnehna an chan theih beiseiin, thil tha nia an hriat tawh phawt tih an intiam mawlh mawlh a. Sawrkar tawh pahnih; MNF leh Congress-in an tih ang an tih ve loh tur thuin mipui min ngamthlem a. An han sawrkar ta cheng a, an intiamna leh thutiam bawhchhiat an ngah avangin, mipui kan phun hi a awm hliah hliah a nih hi. Chu zawng aia pawi leh zual chu, CM Pu Duhoma’n phut zuk pawh nei lova dawt a sawi nasa lutuk hi a ni.
Chuti chungin ZPM sawrkar hnuaiah hian, hmasawnna ropui tak tak thawhin a awm mawlh mawlh a. Mahse, Zoram mipui morale chhe tawh lutuk hian heng hnathawh tha tam takte hi hmu reng mah se, ZPM fak aiin leh lawmthu sawi aiin sawiselna ngawt kan zawngin kan dem ta reng zawk a nih hi. Kuhva rah tawlh rûk tih tawp avanga, kuhva chingtute’n nuai 100 tam an thar chhuah te, healthcare scheme thar avanga mi retheite’n a thlawna inenkawlna an dawn ropuizia te, Revenue Dept tawp lutuk then faia a awm te, sawhthing inleisakna te, Sports incentive cash sem a han ni te, smuggling tih tawpa awm mek te, ruihhlo a maka maka tam an man te, PAMRA LSC tih fela awm te, Electric privatise tumna te, sawrkar hnathawkin a hun taka hlawh an la thei te, aikal lak tih tawp te, transfer & posting mumal ta te, GP Fund duh huna lak theih ta te, Tourism lama hmasawnna kan hmuh zozai te hi, MNF leh Congress sawrkar hnuaia an tih hleih theih miah loh, mipui tam tak phunna leh lungawi lohna a ni tih kan hre reng duh hauh lo a nih hi.
Mi thil tha tih apiang sawisel fai vekna leh, hamthatna lo chan tumna hi Leadership tha nihna a ni lul lo a. Sawrkar kal phung siam that tumna kawnga ruahmanna kalpui tumna pawh a ni bawk hek lo. Politics bawlhhlawhah chuan, an hun laia thil tha ti thei lovin, a ti theite hmalaknaah thang that lak tumin an hmanhlel reng thin a ni zawk. Ngaih dan leh ruahmanna tha zawk neih vang ni miah lovin, mi hnathawh tha sawiseltu mai an ni zawk.
Oppoaition tha reng rengin harsatna chinfel dan an sawi laiin, opposition nep apiang sawiselah an ramtang thin. Chu chu tun huna MNF nihna dik tak a ni. Kan Opposition Leader phei hi chu, a kalna hmun apiangah harsatna chinfelna sawi tur hre si lovin, engkim a sawisel fai vek a. Kristian Politician tih ngam tur a ni hlawl lo a nih hi. A minister laia a lo chet tawpzia leh hlemhletna kawnga a lo chet natzia tar lana a awmchhan pawh, a tawng theih lutuk rah a seng a nih hi. A zak lem hlei lo a!
Zoram mipui nepzia leh sual kan theihnghilh zung zung theihzia a lo lang chiang tulh tulh bawk. Hman ni lâwka sawrkar hmasain, mipui pawisakna nei miah lova mih rah behnate kha, kan theihnghilh hmim der tawh a. Dam lote tâna manganna an siam nasatzia te, Kamrula vanga hlemhletna thlen nasatzia te, ei rûkna leh hlemhletna kawnga insumkarna nei miah lova mipui sum an chalai san zawng zawng kan theihnghilh hmin der emaw tih mai tur a ni leh der tawh.
Fur ruahtui hul ruala PWD hmalakna kal mup mup te, hna lak kawnga fair taka hmalakna te, Minister rual ei rûkna leh hlemhletnaa sawisep an kai loh dan te hi kan ngaihtuah thleng duh der lo. Hlawkna kan chan ve lohna hmasawnna hnathawhah lawmna reng kan neih theih lohnate hi, a tenawmin a hneawm thlawt a nih hi. Kum 39 chhûnga Congress leh MNF kihhnawk then fai tur tam turu buruzia te, kum hnih khat maia chinfel mi a nih lohzia te kan hre duh der lo.
MNF, a bik takin Pu Lalchhandama Ralte hneawmzia, a Minister laia hlemhletna bupui ni siin a kih hnawk hre lek lova a kalna apianga ZPM sawisel paha a thil tih that niawm sawia mahni a infak mawi chawp ngaihthlak reng maite hi a khamawm ngawih ngawih a. Fake Account hmanga ZPM bei leta nitina rak bemgchheng reng ringawt maite hneawmzia hi sawiin a siak lo a nih hi.
ZPM hian thu an intiam hnem rah an sengna kawngah, sawisel mawlh mawlh tur kan ni. Thutiam an din ngheh tâwk lohna kawng hrang hrangah pawh dem tur kan ni ngei e. Tin, sawrkar hmasa sawisel leh demna an chhak chhuak hnem lutukte hi, an tih sual a ni. Sim se la, ngawi rengin hna tha thawk mawlh mawlh se, Zoram mipui hi kan fing tawh tih hre rawh se. Thil tha tam tak an ti mek a. Langtlang takin Bialtu MLA-te’n an biala hnathawh dan an tar lante hi, a chhuanawm thlawt a nih hi. Sawrkar hmasa hnuaia Minister rual inlulinna tih tawpa awm ta te hi a lawmawm a sin.
Chuvangin, Zoram mipuite hian buk lung i khai thiam teh ang khai. ZPM hi an felin an tha famkim dâwn reng reng lo. Mahse, hna tha erawh an phâk tâwkah an thawk nasain, theihtawpa dikin kal an tum tih hi neutral tawh phawt chuan kan hmu ve vek. Mahse, sawrkar hmasa dem vak vakte bansanin, CBI kutah dah mai se. CM ber hian a nungchang siam dikin, tawng thlahdah lutuk a chin hi sim hmak se, an thatpui sâwt ang. Pi Rinpuii, Tetea Hmar, Chhanzova, Rodingliana, PC Vanlalruata, F. Rodingliana-te hi anmahni tâwkah hna an thawk tha thlawt a nih hi.
MNF sawrkar tenawmziate kha i hre thar leh teh ang u. Anni anga ZPM hi an kal a nih vaih chuan, tlak chiah an hmabak dâwn. Zoram mipuite pawhin ZPM hi hun i pe phal teh ang u. An fel tâwk lohna leh tlin tâwk lohna leh, an thil tha tihte i buk ngam ang u. Ruling hmalakna apiang sawisel ringawt politics khelh chhan emaw ti opposition lam hi kan hawi leh a nih ngat chuan, a hma ang bawkin kan rum leh tlawk tlawk ngei dâwn!
ZPM pawh insiam that ngaihna lai in ngah hle. Insiam tha ngam ula, thu mai ni lovin a takin hna tha thawk mawlh mawlh rawh u. Kan CM ber hi insiam tha mawlh rawh se. A tawng tam lutuk leh, duhthusam apiang mai sawi hi sim hmak rawh se. Tichuan, Zoramah hian khua a var ve mial mahna!