Aizawl: Hunpui laia halpuah, halmawi leh puak thei thil khapna thupek leh ‘The Mizoram Firecracjers (Regulation & Control) Bill, 2025’ chu kum thara budget session-a regular bill anga put luh tum a ni.
Home Minister K Sapdanga hovin nimin khan Secretariat Conference Hall-II, MINECO-ah kumin Krismas leh kumthar vuakveta halpuah, halmawi leh puakthei thil khapna thupek (Prohibitory order) leh ‘The Mizoram Firecrackers (Regulation & Control) Bill, 2025’ chungchang ngaihtuahin an thutkhawm a. |hutkhawmah hian ‘The Mizoram Firecrackers (Regulation & Control) Bill, 2025’ chu kumina hmang nghal tur chuan hun a tepter tawh avangin, nakkum budget session-a regular bill anga put luh tha zawka hriain kum thara put luh an rel.
Thutkhawmah hian kumin hi halpuah leh halmawi halin mihring leh ran laka nghawng tha lo a nei theihzia inzirtir uar kum ‘Year of Awareness Campaign on the harmful effects of Firecrackers’ tan hman ni se, kum dang zawng aiin inzirtirna uar ni se, tiin a rel a.
Kum danga lokal pui tawh thin angin, Central YMA kaltlangin YMA member leh kohhran tinte kaltlangin, Central Para Military Force te, Central Police organization hrang hrangte hnenah, Mizoram Merchant Association (MIMA) leh online marketing agency te hnenah leh GAD kaltlangin sorkar hnathawk te hnenah khapna thupek zawm theuh tura ngenna siam leh ni se an ti a. Halpuah, halmawi leh puakthei thil lakluh, zawrh, lei leh hal khapna thupek te tha taka mipuiin an zawm theih nan Central YMA, local council, magistrate leh police te chu thawk dun leh an rel bawk.