BCCI hnuaia U19 Multi Day inelna, Cooch Behar Trophy-Plate khelh mekah Ningani khan Arunchal Pradesh chu innings khat leh run 127-in a hneh a, ni li chhung khelh turah ni hnihnaah hnehna an chang der a ni.
Lal Bahadur Shastri Stadium, Anand, Gujarat-a inkhelah hian Arunachal Pradesh toss-ah chakin vuak hmasak an thlang. 1st Innings-ah over 52.3-ah out vekin run 137 an siam a, Mizoram tan Eric Zonunfela (Sihhmui) chuan wicket li a la a, Vanlalchhuankima (Armed Veng) pawhin wicket thum a la ve bawk a. Maubawk rawlthar, Stephen Lalawmpuia’n wicket hnih lain Saingurpuia (Ramthar Veng) chuan wicket khat a la ve bawk.
Mizoramin bat vein over 89.5 chhungin run 424 siamin an out vek a, Ramhlun Venglai rawlthar, Immanuel Lalpekhlua’n run 140 siamin Lalpekhlua Zote (Zemabawk) chuan run 79 a siam a, F. Lalnunkima’n (Ramthar Veng) run 73 a siam ve bawk.
A vawma che tha, Stephen-a’n run 36 thawh vein captain Malsawmzela’n run 22 a siam ve bawk.
2nd Innings-ah Arunachal Pradesh-in run 160 siamin an out vek a. Vanlalchhuankima’n wicket ruk a la a, Immanuel-a’n wicket thum lain Isak Lalremruata’n wicket khat a la bawk.
Vawi hnih thawhah Arunachal Pradesh-in Mizoram vawi khat tawha run siam zat an phak loh avangin Mizoram chuan innings khat leh run 127-in hnehna an chang ta a ni.
Mizoram hian Thawhlehni atang hian Zirtawpniu thleng Anand-ah Meghalaya an hmachhawn leh ang.