Mizoram Youth Commission (MYC) Chairman Malsawmzuala Ralte chuan ZPM kaihhruai sorkar hnuaiah kum hnih chhungin Mizo thalai 400-in hna an hmu tawh a, an zinga 99 chuan sorkar hnaah an lut tih chanchinbumite hmaah a sawi.
Ningania Aizawl Press Club-a chanchinbu mite a kawmnaah Malsawmzuala Ralte chuan, ZPM sorkara MYC kaltlangin sorkar kum liamta 2024-25 chhung khan thalai 178-in hna an hmu a, kum kal mekah mi 222 in hna an hmu tawh tih sawiin, sorkar hna ringawt lo deuh mi tam zawkin an ban phak chu an ngai pawimawh tih sawiin, theihtawp an chhuah chhunzawm zel dawn tih a sawi.
Malsawmzuala Ralte chuan Mission UPSC hnuaiah UPSC prelim-a tlingte an zirna bungrua leina an tumsak thin thu a sawi a, mi 35,000 zel an pe a, Mains-a tling pakhat chu a kalna leh hawna leh a thlenna ei leh in an tumsak thu a sawi a. Super IAS-a coaching class nikum thlenga Delhi-a kal Andy L. Khobung, Chanmari West chu UPSC CDS exam-ah a inziaktling tih a sawi.
MYC chairman sawi danin, MYC kaltlang hian 2025-26 chhung hian Hotel management, Food & Beverage training chhuak mi 136-in hna an hmu a, nikum lama mi nen mi 258 an tling tawh. MYC coaching zirlaite atangin kumin hian mi 66 te sorkar hnaah an inziaktling a, nikum lamah khan mi 33 an inziaktling bawk.
MCS Combined Exam Coaching Class, Group B&C Coaching Class, SSC, banking & Railway Coaching Class, Hotel management, food & beverage training te an kalpui a. Hotel management, food & beverage training atangin 2025-26 chhungin thalai 136-ten hna an hmu a, an zawm tawh a. Spa therapist mi 14 2025-26 chhungin mi 14-te Lalit hotel hnuaiah hna an hmuh tawh bawk.
MYC kaltlangin mi pangain kumin March khan British Army-ah training an zawm a, chawlhkar riat vel an training chhung hian thla khatah Rs 2,00,000 an hlawh pha a. TATA Strive leh National Skill Development Corporation International (NSDCI) te nena an thawhhona hnuaiah Japan-a nurse thawk tur an buaipui a. Online hmangin Mentorship Programme an kalpui tih a sawi a, a vawi khat nan July-October, 2025 khan neih a nih thu leh January, 2026 hian neih leh tum a ni a. Top International, Taiwan te nen thawhhona thuthlung an ziahna hnuaiah Taiwan-a Chinese tawng zira an tirh chu zirtirtu-ah hmanga a pass apiang chu TOP International company te hian Taiwan-ah hna an hmuh sak thei dawn a ni.
Learnet Guwahati nen thawk ho vin, Germany-a nurse hna thawk duh tan Guwahati-ah German tawng zir Mizo thalai paruk awm mekin, thla 10 chhunga tawng an thiam a, an pass hnuah an thawk thei dawn a ni.
MYC hnuaiah Japan-a upate kum upa enkawl hna thawk duh tan Guwahati-ah Japan tawng zir theih a ni a, zirna senso atan Learnet hian loan an buaipui sak thei a. MYC chuan Corporate Social Responsibility (CSR) atangin puihna petu Honda, SBI leh MRB ho atangin an sum hmuh tawh zawng zawng chu Rs. 57,72,318.00 a tling tawh.
Malsawmzuala Ralte chuan, MYC chuan Mizo thalaiten lehkha chhiar an uar theih nan ‘promotion of book reading culture’ an buatsaih dawn tih a sawi a. Lehkha chhiar tlem avanga Mizo thalaiten chona leh harsatna an tawh chhoh mek sukiang thei turin he programme hi duan a ni a, lehkha chhiar tam inzirtir an tum tih a sawi bawk.