Tourism Minister Lalnghinglova Hmar chuan kumin Winter Festival 2025 an buatsaih tur chu Krismas lam hawi a ni dawn tih sawiin, Mizoram chu khualzin mite tan Krismas destination-a chantir an tum tih a sawi.
Ningani khan tourism minister chuan a pisa-ah chanchinbu mite kawmin, tun hnaia tourism department hmachhawp langsar zualte a sawi fiah a. A langsar zual zingah December 15-20 leh 23-ah Lammualah Winter Festival 2025 hman a ni dawn a, kum danga la awm ngai lo thil thar a awm dawn tih sawiin, “Krismas theme a ni dawn a. December 23-ah Krismas hawi Costume Parade leh Carol a awm dawn. Lammual leh a chhehvel pawh Krismas theme-a chei a ni ang,” tiin, Mizoram chu khualzin mi (tourist) tan Krismas destination-a chantir an tum tih a sawi.
Minister sawi danin Winter Fesrival 2025-ah hian charity stall a awm dawn a, hetah hian mi chanhai zawkte hnena pek chhuah leh tur thawmhnaw leh thil dangte a thawh theih dawn a. Concert bakah lâm, stall chi hrang hrang, naupang intihhlimna leh infiamna te pawh a awm dawn a. State pawn atangin artist pathum an lo kal dawn tih a sawi.
December 31 tlaiah Sihphir khawtlang hruaitute bakah Sakawrhmuituai Development Committee nen tangkawpin Sakawrhmuituai tlang atangin kum hlui thlah nan tlai ni tla thlir liamna hun buatsaih a ni dawn tih a sawiin tourism minister chuan, “Kuminah Mizo thalai rualin Sakawrhmuituai tlang atangin ni tla kan thlir liam ang a, a mawizia leh nawmzia kan thehdarh ang. ‘Mizoramah tlang mawi em em atangin kum khata ni tla hnuhnung ber an thlir liam thin’ tih an hria ang a, nakumah chuan state pawn atangin mi thahnem tak an rawn tel tawh kan beisei,” a ti.
Lalnghinglova Hmar chuan Phuaibuang khuaa Tlaizawng (Cherry Blossom) par mawi tak behchhanin kum thar, January 6 leh 7-ah tourism event huaihawt tum a nih thu a sawi bawk.
Tourism thang chho zelah Mizoram mipuiin hlawkna tam zawk an neih theih nan ‘The Mizoram Banakaih (Handholding) Scheme’ hnuaiah Mizoram chhung khaw hrang hranga homestay dinna tur dil mek a nih thu a sawi a. Homestay pakhatah Rs. 5,00,000 zel hisap niin, a bultan nan khaw 40-ah homestay 100 din phawt tura ruahman a nih thu a sawi.
Tourism minister chuan tourism-a hmasawn tur chuan tourist hip a ngai a, chumi tur chuan Mizoram nawmzia tar lana tlawh chakawma an pho chhuah a tul tih a sawi a. An hmunhma (tourist destination) mawi tak takte hi Mizorama awmten an ngaihhlut thiama an tlawh nasat poh leh state pawn atangin rawn tlawh ve an châk dawn tih sawiin, “Keimahni leh keimahni kan intlawhpawh tam hian pawisa virvel a titam a, local economy a chawikang bawk a ni,” a ti a. Tourist hip turin hmunhma bakah an tana tlawh chakawm tur event buatsaih a ngai. Festival leh event dangte hi hun leh hmun nghet neia buatsaih a, ‘Tourism Calendar’ siam turin chak taka hma lak mek a nih thu a sawi.