2025 Formula 1 season an khar fel ta a, intlansiak hnuhnung berah driver champion a hriat chiah a. Abu Dhabi-ah Max Verstappen chu pakhatna ni mah se a pum puiah Lando Norris chu champion a ni thei ta tho a ni.
Season hman zawh taka pahnihna, vawi li world champion ni tawh, Verstappen chu Formula 1 driver zinga hlawh hnem ber a ni mek a. Dutch driver hian Red Bull-ah contract a ziah khan kum khatah £ maktaduai 50 a hlawh tling tep a. Hei mai hi a la ni lo a, pakhatna a nih te, podium a lawn phak hrim hrimte hian bonus a awm zel bawk.
Driver senior Lewis Hamilton pawhin a hlawh tlem lo hle a, kum khatah £ maktaduai 45 a la hlawh a, Ferrari-a a teammate Charles Leclerc nen an inthlau hle a, Monegasque driver hian kum khatah £ maktaduai 25 a hlawh.
Aston Martin driver Fernando Alonso chuan kum khatah £ maktaduai 15 a hlawh a, McLaren driver, world champion thar, Norris pawhin kum khatah £ maktaduai 15 a hlawh mek.
George Russell chu Mercedes-in season khatah £ maktaduai 11 an pe a. Alpine driver Pierre Gasly leh Williams driver Carlos Sainz Jr. te chuan season khatah £ maktaduai 7.5 ve ve an hlawh bawk.
Williams driver pakhat zawk, Alexander Albon chuan £ maktaduai rik a hlawh a, Sauber driver Nico Hulkenberg chuan £ maktaduai 5.2 a hlawh mek a. Haas driver Esteban Ocon-a’n £ maktaduai 5.2 a hlawh mek a, McLaren driver Oscar Piastri-a’n £ maktaduai 4.4 a hlawh ve mek a ni.
Aston Martin driver Lance Stroll-a’n £ maktaduai 2.2 a hlawh a. Mercedes driver Kimi Antonelli, Sauber driver Gabriel Bortoleto leh Red Bull driver Yuki Tsunoda te chuan season khatah £ maktaduai 1.5 an hlawh hlawm a ni.
Haas driver Ollie Bearman, Alpine driver Jack Doohan, Racing Bulls driver Issack Hadjar leh Racing Bulls driver Liam Lawson te chuan season khatah £750,000 vel an hlawh bawk a ni.
Infiamna dangte ang lo takin world championship title latu chuan a hranpain trophy lak manah pawisa a dawn belh dawn lo va, team atangin bonus a dawn ngei a rinawm thung.