Aizawl: Home Minister K. Sapdanga leh I&PR Minister B. Lalchhanzova te chuan kumin Republic Day lawmnaa chanchinbumite lungawi lohna chungchanga a kaihhnawih department hotute chu Nilaini khan an sawipui.
Home Minister Office Chamber thutkhawmah hian Republic Day Organising Department zinga mawhphurhna latu, Aizawl Deputy Commissioner Office, State Protocol Office leh Directorate of Information & Public Relations hotute an tel.
Home minister chuan chanchinbu miten lungawi lohna leh harsatna an nei chu pawi a tih thu sawiin hun lo kal leh zel turah felfai zawka ruahmanna kalpui a nih theih nan a huaihawttu sorkar official-te nen sawiho a pawimawh tih a sawi.
IPRP&S Minister B. Lalchhanzova chuan chanchinbu mite chu sorkar hunpui leh pawimawh tiphuisuitu leh tizahawmtu an ni a. Ruahmanna fumfe loh avanga harsatna an tawk hi pawi a tih thu a sawi.
IPRP&S Secretary Betsy Zothanpari Sailo chuan journalist-te lungawi loh chungchangah MJA hruaituten pawh an inbiak tawh thu te, official atanga insiam that ngai lai te pawh a awm thu te a sawi.
Aizawl Bawrhsap Er. Lalhriatpuia pawhin chanchinbu mite lungawi lohna lo thleng chu pawi a tih thu sawiin anmahni pawh an inchhui let a, an naute zinga inzilh ngai leh inhrilhfiah ngaite pawh hma an lak tawh thu a sawi a, a tul ang zela hma lak a nih tur thu leh tun hnuah chuan uluk leh fimkhur zawka hma an lak tawh tur thu a sawi a ni.
Thutkhawmah hian Aizawl DC kaihhruaina hnuaiah Protocol Office leh DIPR-ten hun remchang hmasa berah MJA hruaitute kawma sawiho tha an ti a, Republic Day leh Independence Day-ah media enclosure siam ziah tawh nise an ti a, sawmna sem chhuah chungchangah pawh fimkhur lehzuala kalpui nise an ti bawk.