Aizawl: Aizawl Municipal Corporation (AMC) chuan Khatlaa MLA Hostel building bul kawngpui sira thei zuar mi 11 la awmte chu AMC Multi-Complex building, Tuikual South-ah insawn turin an hriattir nawn.
Nilainia AMC thuchhuah tarlan danin, MLA Hostel building chu sak that a tul avang leh building hlui thiah a nih tak avangin, a sakna hmun tur lei laih a ngai a; chuvangin helai hmuna thut hi mihring tan a him loh avangin State sorkar leh AMC chuan helai kawngpui sira thei zuar mi 11-te chu loh theih lohin Tuikual South-a AMC Multi-Complex chhungah sawn chhuah an tul ta tih an sawi.
January ni 6, 2026 khan Thei Zuar Association President hnenah hriattirna pein, January ni 16, 2026 ral hman ngeia AMC Multi-Complex Tuikual South, 3rd Floor (Seat No 17 to 16 & 41) a insawn tura hriattir ni mah se, an la insawn loh avangin show cause notice January 23, 2026-ah pek nawn an ni a. Hetih lai hian Revenue Office bula thut an dilna chu AMC Executive Council-in ngaihtuah a, ruahmanna siam tawh chu kaltlangpui turin a nemnghet.
An dilna chu phalsak an nih loh thu leh AMC Multicomplex, Tuikual South-a insawn chhuak tura hriattirna lehkha chu President, Theizuar Association, Khatla hnenah January 23, 2026 khan pe nawn lehin nimin thleng khan an la insawn lo va. Aizawl hmasawnna tura state sorkar leh AMC hmalaknate thlawp zel turin mipuite an sawm a. Hetih rual hian a dodal zawng leh hnathawh tibuai zawnga awm lo turin an inbeisei nghal a, thu awiha insawn turin thei zuarte hi an duh hle tih an sawi.