Aizawl: Horticulture Minister C Lalsawivunga chuan Mizorama thlai tharte chu chemical tel lo (organic) an nih avangin a quality a thain an hrisel bik tih a sawi.
Mizoram Agricultural Marketing (MAMB), International Fund for Agricultural Development (IFAD) leh Mission Organic Mizoram (MOM) tangkawpin nimin khan ‘Private sector round table on Mizo Ginger cum Buyer Seller Meet 2026’ chu Aijal Club-ah an buatsaih a. Hmanpuitu horticulture minister chuan sorkarin lo neitute leh kuthnathawkte eizawnna tihhmasawna an dinhmun chawikan a ngaih pawimawh thu a sawi.
Mizorama thlai tharte hi organic an nih avangin a quality a thain an hrisel bik tih sawiin, NiTi Aayog-in Mizoram chu Ginger Capital of India-ah a puang chu lawmawm a tih thu sawiin, Mizoram sawhthing hi a quality a thain, a rim a tui bik vang a ni, a ti a. Mizorama tharchhuah thlai leh thil dangte lei tura Mizoram pawn atanga lo kalte chungah lawmthu a sawi.
Buyer Seller Meet-ah hian thawhhona thuthlung pahnih – Ropuiliani Farmers Producers Company leh Kisaansay te inkarah leh IRMA Iseed leh Mizoram Startup Mission-te inkarah MoU an ziak a ni.
Buyer Selles Meet-ah hian India ram hmun hrang hrang atangin investor leh buyer lian tak takte sawm luh an ni. Heng mite hian Mizoram sorkar nena thlai tharte leh process food-te lei leh hralh kawnga thawhho theih dan kawng hrang hrang rawtna an rawn thlen a. Mizorama entrepreneur hrang hrangte nen pawh thawhho theih dan tur an sawi ho a ni.