Aizawl: Marina Lalchhanchhuahi thihna chhuichhuah a nih chungchangah duh khawp lohna au chhuah puiin Justice for Marina group chuan nimin khan kawng zawh an huaihawt.
Justice for Marina group chuan Marina Lalchhanchhuahi tualthihnaa pawikhawihtu leh mawhphurtu RL Peka chauh a nih an rin loh avang leh, inhnamhnawih dang an awm an rin avangin kawng zawh an huaihawt a ni.
Kawngzawh tute hian Vaivakawn atanga tanin, lirthei hmangin Chanmari kawn an pan a. Hemi hnu hian kein Millennium Centre an pan a, ke bawkin Vana pa hall kawt panin hetah hian kawng zawh an titawp a. Kawng an zawhnaah hian Marina-i thihna avanga an lungawi lohna an aupui bakah, thuziak hrang hrang an keng bawk.
Kawng zawhna khar a nih hnu hian, Aizawl SP-ah Marina Lalchhanchhuahi tualthihna hriat belh an duh te chhuichhuah sak ngei tura ngenna lehkha an theh lut nghal a ni.
Tar lan tawh angin, Mizoram Police chuan hun eng emaw chen a bo hnua December ni 13, 2025 tlai dar 5:25-a MZU campus-a a ruang hmuh, Marina Lalchhanchhuahi (26) d/o Joseph Malsawma (L), Tanhril thihnaah RL Peka (62) s/o RL Dama (L), Tanhril Vengpui chu pawikhawihtu leh mawhphurtu ber nia an hmuh chhuah thu, Thawhlehni khan Mizoram Police thuchhuah siamin an tar lang a ni.