Lai Autonomous District Council (LADC)-a Chief Executive Member atan lakluh, C. Lalsawmzuala chuan sorkar thar siam turin thlawptu a ngah tawh tih fiah niin, MNF leh Congress thawkdun, United Legislature Party chuan sorkar puitling an siam thei ta a ni.
LADC-na a MNF leh Congress inkawp, United Legislature Party hruaitu C. Lalsawmzuala chu Ningani khan LADC Chairman C. Lalmuanthanga kaihhruaina hnuaiah LADC Session-ah thlawptu a neih dan fiah a ni a, member 25 awmnaah C. Lalsawmzuala chuan thlawptu a ngah tawk tih fiah niin, member 15 ten CEM ringtawk zawngin ban an phar a, member pakuain ringtawklo zawngin ban an phar.
CEM ringtawk lamah hian MNF member pariat, Congress member paruk bakah C. Lalneihkhuma, Independent ten ban an phar.
Hemi hnu hian Chairman C. Lalmuanthanga chuan CEM C. Lalsawmzuala’n thlawptu a ngah tawk tih a puang a, CEM chuan amah thlawp tute chungah lawmthu sawiin, a thlawplo zawnga ban pharte pawh sorkar tha din a nih theih nan thawhpuiah a sawm.
Chief Executive Member-in thlawptu a ngah tawk vanga lawmpui thu sawi zingah C. Ngunlianchunga leh V. Zirsanga te pawh an tel.
LADC-a CEM atan hian tun chawlhkar Thawhlehni khan C Lalsawmzuala hi lak luh a ni.
LADC term 12-ah hian MNF hian MDC pariat, Congress-in pasarih neiin MDC 15 an awm a. Eptu lamah ZPM MDC paruk, BJP MDC pahnih leh Independent MDC pahnih an thu ang.