Aizawl: Kum tin February Pathianni hmasa ber huamah neih thin angin EFCI kohhranah Presbytery 16, Area Presbytery pahnih leh mission field pariatte chuan January 30-February 1, 2026 chhung khan bial pum huapin India hmarchhak state hrang hrangah Presbytery leh Mission Field Inkhawmpui tluang takin an hmang.
He inkhawmpuiah hian rorelna leh kum 2026-2028 chhung atanah Presbytery leh Mission Field hruaitu thar thlanna neih a ni a. Biak in inkhawm thlarau thupui atan ‘Rinnaa ding nghet’ (I Korinth 16:13) hman niin, Pathianni chawhma inkhawmah Kohhran Upa Ordination hunserh neih a ni bawk.
EFCI Mizoram Region chhungah Presbytery panga te chuan Khanpui (Aizawl Presbytery), Bungtlang South (Lunglei Presbytery), IOC, Vairengte (Kolasib Presbytery), Vaitin (Sakawrdai Presbytery) leh Suangpuilawn (Khawlian Presbytery) Biak inah te an hmang a ni.