Khawvel hmasawnna rualin ke kan pen chho zel a, kan ram leilungah pawh khawvel ram hrana mite an rawn tek lut chho ve zel a, lo dawnsawn dan pawh kan thiam chhoh zel a tul bawk.
Sorkar pawh theihtawpin a tang a, Tourism department te hian tun hma zawng aiin tan an la emaw tih mai tur khawpin khawvel huapa kan ram chawisan theihna tur kawng an dap a, an hmalak chhohna kawng hrang hrang hi hmuh hmaih chi a ni lo.
Kan ram hi a mawi a, khawvel dang nen khaikhinin lo phun lo phun pawl awm thin mahse, kan tlangram nuam ringawt thlahlel leh hmuchak hian khawvel ramdanga mite hi an lo lut nawlh nawlh fo a, hei hi inchhuanna thama kan neih tur leh kan intihtheihna tham tur a tling miau a ni.
India ram hmundang leh khawvel hmun hrang hrang atangin tlawhtu hi kan nei chho mawlh mawlh dawn a, a chhunga chengte hian inhawng tak leh rilru zau tak pu chunga kan lo dawnsawn thiam fo a tul hle.
Hemi kawnga sorkar hmalak tawhna leh hmalak chhohna hrang hrang hi a ropui a, fak tlak pawh a ni a, khawvela kan hmel lan theihna pakhat a nih miau avangin mipui lam pawhin khualzin hrang hrangte lo lawm thiam tura a theihna zawna sorkar lo tawiawm thiam chhoh zel pawh a tha awm e.