Aizawl: Mizoram State Commission for Protection of Child Rights (MSCPCR)-in ri hriatna lama harsatna nei leh mitdelten an lo chhiar ve theih nana video clip leh mitdel hawrawp (Braille) hmanga The Protection of Children from Sexual Offences (POCSO) Act, 2012 lehkhabu (booklet) an siam chu nimin khan Adviser to chief minister (political) Lalmuanpuia Punte, MLA-in a tlangzarh.
I&PR Conference Hall, Lianchhiari Runa Project Child Law for Everyone, Accessible & Readable (CLEAR) hnuaia kalpui pianphunga rualbanlo naupangte tana buatsaih, POCSO Act leh a kaihhnawihte sign language leh mitdel hawrawp (braille) a siam a tlangzarhnaah Lalmuanpuia Punte chuan lehkhabu leh video clip a tlangzarhte hian nasa taka piangphunga rualbanlote a puiha a venhim a beisei tih a sawi.
Pianphunga rualbanlo naupangte chuan anmahni tana hamthatna awm angte leh harsatna an tawh pawha humhimtu dan awm angte an hriat ve ngei chu an chanvo a ni a, chumi atana mitdelten anmahni hawrawp ngei leh ri hriatna lama harsatna neiten sign language ngeia chutiang dan an nei thei chu ram pum huap pawhin a chhuanawm hle tih a sawi a. POCSO Act leh a chhunga pawimawh zualte sign language leh braille-a siam chu Mizoramin bung thar pawimawh tak a kaina leh rualbanlote ngaihsak kawnga mipuite hmasawnna thlentu a nih ngei a beisei tih a sawi bawk.
MSCPCR Chairperson Jimmy Laltlanmawia chuan MSCPCR hmalakna pawimawh zualte sawiin budget an neih tlem avanga duh ang thala hmalak a harsatna thu a sawi a. Chutih rualin sorkarin a ngaihsak avanga tum hnih lai additional budget an lo pek tawh avangin lawmthu a sawi bawk a. Hun lo la kal zelah pawh RTE Act leh naupang kaihhnawih dan pawimawhte chu mitdel leh ri hriatna lama harsatna neiten an lo hman tangkai ve theih nan kawng zawn zel a nih tur thu a sawi bawk.
Inkhawmah hian khual zahawm Commissioner for Persons with Disabilities (PWD) Vanlaldiki Sailo pawhin thu a sawi a. Inkhawm chhung zawng hian hmun danga la tih ngai loh, thusawitute thusawi zawng zawng hi sign language interpreter (tawng lettu)-in zaizirin (sign language) a lo let a ni.