China-a football huangah thil dik lo an chhui chhuak nasa a, eirukna leh match fixing chungchang vangin mi 73 chu dam chhung atan an hrem bakah club 13 pawh an hrem bawk.
President Xi Jinping kaihhruaina hnuaiah an rama football huanga eirukna chungchang an chhui nasa a. Kum eng emaw zat an chhui hnuah eirukna a nasa hle tih an finfiah a, match fixing pawh a nasa hle tih an finfiah bawk.
Chinese Football Association (CFA) hruaitu pawimawh deuh deuh bakah football player thahnem tak chu eirukna te, match fixing te, pawisa thap vang tein thiam loh an chantir a, an hrem a. Heng zingah hian China head coach hlui, Li Tie pawh a tel a. Professional club 13-te pawh hetiang kaihhnawih thubuaiah hian thiam loh chantir an ni.
Club 13 chu CFA chuan kalphung dik leh pangngaia kal tawh tura an hriattir bakah an rama football boruak thianghlim lo chu nuai bo thei tura theihtawp chhuah turin an ti a. Dik taka inelna kalpui tawh turin an hriattir bawk a ni.
Everton player hlui, kum 2019 atanga 2021 chhunga China coach pawh lo ni tawh, Li chu December, 2024 khan inthamna chungchangah thiam loh an lo chantir tawh a, kum 20 chhung tan ina tang turin an chungthu an lo rel tawh a. A dam chhungin football kaihhnawiha inhnamhnawih thei tawh lo turin an hrem a, hetiang deuh hian mi dang 72 pawh an dam chhunga football kaihhnawiha tel thei tawh lo tura hrem an ni.
CFA chairman hlui, Chen Xuyuan pawh thiam loh chantir zingah hian a tel a, $ maktaduai 11 zet thamna a lo la tih an finfiah avangin dam chhunga tang tura a chungthu rel a ni.
2025 Chinese Super League khel club 16 zinga club 11 chu thiam loh chantir zingah hian an tel a, hei vang hian an point an paihsak dawn bakah pawisa chawitir an ni ang.
Division hniam lama tla thlate an awm a, tla ve lo team pakuate chuan March-a 2026 CSL season tan hunah -9 point hmuin bul an tan dawn a. Tianjin Jinmen Tiger leh nikuma CSL pahnihna, Shanghai Shenhua chu an hrem na ber a, point 10 ve ve paihsak an nih bakah Yuan maktaduai khat ($144,000) ve ve chawitir an ni.
Season thum chhung champion ni tawh, Shanghai Port chu point nga an paihsak dawn a, Yuan 400,000 an chawitir dawn bawk a. Hetiang chiah hian Beijing Guoan pawh an hrem dawn bawk a ni.
China-a professional club eng emaw zat chu an tla chhe mek a. CSL chanchina club hlawhtling ber pawl, Guangzhou FC pawhin an leiba an rulh theih loh avangin kum 2025 khan an lo titawp tawh a ni.
Football ngainatu, Chinese President Xi chuan an rama World Cup thlen te, world champion nih theih te a tum hle a. Kumina US, Canada leh Mexico te thlen turah hian tling lo mah se an hma hunah la tlin chhoh ngei a tum hle a. Tun atangin an rama football huanga boruak tha lo chu hnawh bo tumin tan a la nasa a, a duhthusam thlentir a tum.