Aizawl: Central YMA President R Lalngheta’n Inrinni khan Khawkawn khuaah YMA Kumpuan ‘Ruihhlo Do’ a hawng a. Ruihhlo zawrh avanga Mizo hnam sawptute chu sawp let ve a tul takzet tih a sawi.
Inkhawmah Central YMA President chuan, Khawkawn khua chu Manipur luh dawn a Mizoram lama khaw tawp ber an nih avangin, ruihhlo do kawngah Branch tangkai tak leh mawhphurhna lian tak nei an nih thu a sawi.
Ruihhlo do hi mi huat hlawh theihna a nih rualin, Mizoram leh hnam tana thil pawimawh tawpkhawk a nih thu sawiin R Lalngheta chuan, “Kan thalaite ruihhlo avanga nunna chan mek chhanchhuak tur hian hruaitute kan huaisen a ngai a ni. Damdawi zuarten an thiltih an zahpui loh chuan, eng vangin nge keini hian do kan zah bik ang? ‘|hian chhan thih ngam’ kan tih thin hi a taka hman a ngai a, ruihhlo zawrh avanga kan hnam sawptu te hi kan sawp let ve a tul takzet a ni,” a ti.
Central YMA president chuan ramri-a police-te thuam chak a pawimawh thu sawiin, ramri-a YMA-ten duty post an siam hian awmzia a neih tel a beisei thu a sawi bawk. Thil dik lo titute laka case khauh tak kan siam duh a nih chuan, dan zawm chunga hmalak a pawimawh thu a sawi bawk.
India ram hmun dang lakah Mizoram chu ruihhlo leh HIV/AIDS-ah Mizoram dinhmun a sang hle tih sawiin R Lalngheta chuan, “Hnam damna tura kan chetchhuahna hi Pathian rawngbawlna a ni. Kan choka a kang mek a, kan inpui a kan kai hma in kan tan a ngai a ni,” a ti bawk.
Khawkawn Branch YMA-ah hian tun dinmunah member mipa 346 leh hmeichhia 364, an vaiin 710 an awm mek a ni.