Leicester City chu sum chungchanga club hrang hrang inkaihhruaina dan bawhchhiat vangin point ruk paihsak an ni a, hei vang hian division hniam lama tlak an hnaih lehzual phah hle.
England-a second division, Championship-a khel mek, Leicester City chu club hrang hrang sum enkawl chungchanga inkaihhruai dan tur zawm famkim lo an ni tih finfiah a ni a. Hei vang hian thuneitute chuan dan ding lai hmangin an point an paihsak a, point ruk ngawt paihsak an nih avangin Championship mawng lamah an tla thla a, 17-na atangin 20-naah an tla a, goal difference vang chauhin tlahniam thei dinhmuna dingte aiin an sang zawk rih.
2023-24 season thlenga chhutin Leicester City hi English Football League (EFL)-in Profit and Sustainability Rules (PSR) dan an duan hmanga thiam loh chantir an ni a. Thiam loh an chan chhan hi season thum chhunga an pawisa hloh a tam tawh em vang a ni.
EFL chuan season thum chhunga Leicester City pawisa hloh tling khawm chu £ maktaduai 20.8 zet a nih thu an puang a. Hei bakah hian Premier League dan pawh an bawhchhia niin an puh bawk a, kum khat chhunga an sum hman dan chu thuneituten an dil hunah an pe lo niin an sawi.
Thiam loh chantir an nih chungchangah Leicester City chuan thil awm ang lo tak nia an ngaih thu an sawi a. Thuneitute chuan dik tak leh rualkhai taka ro rel thin tura an duh thu sawiin, an chhui dan a felhlel deuh nia an hriat thu an sawi a ni.
Season kal mekah Leicester City chuan an inkhelh hnuhnung paliah chak hmel an hmu miah lo a, thla hmasaa an manager Marti Cifuentes an bân hnuah manager nghet an la nei rih lo bawk a ni.
2015-16 season-ah khan mak deuh maiin Premier League-ah an champion nawlh kha a ni a. Kum 2021 khan a vawi khatna atan FA Cup champion an ni bawk a, kum 2023 khan Premier League atangin Championship-ah an tla thla leh ta thung a ni.
Enzo Maresca kaihhruaina hnuaiah Premier League-ah chho leh mah se season hmasa khan vawi 38 khelhah vawi ruk chauh an chak thei a, Championship-ah bawk an tla thla leh a ni.
Tlahniam thei dinhmuna ding bawr velah an awm tak avangin Leicester City hi an che chhe zui zel a nih chuan a aia hniam, third division, League One lamah an tla thla zui dawn a ni.