Aizawl: MNF Adviser TC Pachhunga, ex-MLA chuan rambuai kha kawng thenkhatah chhiatna ni mah se, kawng tam takah hmasawnna thlentu a ni tih a sawi.
Thawhtannia MNF Hnam Run-a chhung inkhawmah TC Pachhunga chuan, “Mizoram hi Assam district a nih laiin, an nulaten vai thawmhnaw an ngaina tan a, sumdawng an huangtau tan a, chutiang anga Mizo hnam nun chhe mek tungding tur chuan MNF party hi Laldenga inah din niin zalenna an puang zui ta a, Mizote mikhualah pawh inthleng tha duh tawh loh kha an innel leh tan a, vai sumdawngte pawh an tawmim leh tan a, an chhehvel state-ah sumdawng lian chu hnam dang, vai an tihte an ni vek tawh. Hetianga an awm leh theihna hi nationalism vang a ni tih loh theih loh,” a ti.
Thalaite thinlungah zalenna a lian a, thenawm lawkah Cachari-ho nek ral an ni a, Tripura nise, Reng ram a ni, tunah chuan an ram hruaitute-ah pawh tlang mi chu pahnih khat lek an ni tawh. Mizoram erawh chu Pathian zarah hnam movement-in a la hruai tih sawiin MNF Adviser chuan, “Rambuai kha kawng thenkhatah chhiatna ni mah se, kawng tam takah chuan hmasawnna min thlentu a ni a, politics inchirhthehnate chu nei bawk thin mah ila, hmasawnna pawh a kai rual em em a ni,” a ti.
MNF adviser chuan Mizorama mei mit lova kum 60 chuang kal tawh political party-ah MNF ang hi India-ah an awm ve lo tih a sawi a. “ZPM hian MNF leh Congress hlirin rorelna an chelh a, mipuiah enchhin tura inzuarin hneh takin sorkarna an siam a, chak takin hma an la ang chu tihnaklaiin, an minister leh worker-te thusawi apiangin sorkar kal tawhte sawichhiat leh mawhpuh loh chu an thiam lo va, nasa takin opposition party an beia, tuna an kal dan hi mawhphurhna la ngamlo awm dan dik tak a ni,” a ti bawk.