Aizawl: MNF Senior Vice President Dr. R. Lalthanglianam chuan Thawhtanni khan Champhai Circuit House-ah Champhai MJA-te kawmin, Champhai khawpui hmasawnna tur kawng hrang hrang an sawiho.
An inkawmnaah hian Dampa bialtu MLA ni bawk, Dr. R. Lalthangliana chuan sorkarna an chang leh a nih chuan thuneihna semzai an ngai pawimawh dawn tih sawiin, “Aizawl leh Lungleia Municipality kalpui mek chu MNF sorkar ruahman tihpuitlinna a ni a, mipui tam dan a zira khawtlang inrelbawlna chu a tul ang zela kalpui a ni dawn a ni. Champhai khawpui chhung kawngpui tam zawk chhe lutuk chu a vanduaithlak hle a, Champhai leilet zawl chu buh chauh ni lo, thil dang tharchhuahna tura butsaih a tul a ni,” a ti.
Dr. R. Lalthangliana chuan, kum 2028-a MLA inthlanpui lo awm turah an party manifesto tur leh sorkarna an chan huna an programme turte mi thiam rual, Drafting Committee-in an buatsaih mek a, sub-Committee peng pasarih ten an peihfel thuai an beisei tih a sawi bawk.
Champhaia thuthar thehdarhtute chuan Champhaia University Eastern Campus emaw, Post Graduate zirna emaw dah te, sorkar enkawl Higher Secondary School dang dah belh te, Polytechnic leh ITI building sak zawh tawh a taka kalpui te, Champhai khawpui tui harsatna sutkianna tura Greater Champhai Water Supply Scheme Phase-II kalpui thuai a tul thute Dr. R. Lalthangliana hi an lo hrilh a ni.