Aizawl: Mizorama Entrepreneur lam buaipuia kalpui mekten Mizoram tana hmasawnna a kal theih nana Mizoram Entrepreneurs’ Chamber (MEC) an din chuan Thawhtanni khan Aizawl Press Club-ah thu thar thehdarhtute an kawm a, Mizoram sorkar department hrang hrang hnuaia economic development policy leh ruahmanna an siam dawn reng rengin entrepreneur-te telh ve thin turin Mizoram sorkar an ngen.
MEC Chairman Joseph L Ralte chuan entrepreneur tihchangtlunna atan leh sorkarin hma a lak duh chuan theihtawpa thlawp an inhuam thu a sawi a. “Mizoram sorkar department hrang hrang hnuaia economic development policy leh ruahmanna an siam dawn reng rengin entrepreneur-te min telh ve thin turin Mizoram sorkar kan ngen a, hei hian sorkar hmalakna a tihchak kan beisei a ni,” a ti.
MEC hruaitute hian Mizoram tana pawimawh leh an vei zawngte sawiin fin chhuahtu nih an tum thu an sawi a. “Kan ram hmasawnna tur khawlpui (engine of growth) chu entrepreneurship hi a ni a. Chu khawlpui tivir tur chuan department-ten engkim tih tum lo se. Policy leh fund an chhawpchhuak ang a. Mipuite tan facilitator an ni ang a, keini entrepreneur-ten khelmual zauva footballer-ten football an khel ang hian hma lam pan turin kan khel ang a. Sorkar hna chauhva innghat lovin private sector a lo thang ang a. Kan thalai hna hmu loten mumal takin eizawnna an lo nei thei dawn a ni,” an ti.
Entrepreneur lam hawi a tul hrang hrang atan mumal taka budget-ah sum daha hma la turin Mizoram sorkar an ngen tih Joseph L Ralte chuan a sawi a. Hei bakah hian Planning & Programe Implementation hnuaia Science & Technology awm mek chu department-ah hlan kai ni se, hei hian entrepreneur lama hmalakna pawh a tichak lehzual ngeiin an ring tih a sawi bawk.
MEC hi December 30, 2025-ah din a ni a, tun dinhmunah private firm hlun leh rintlak tak tak member 43 an awm mek.