Nausen pahnih tela mi 55 phur thelret lawngleng chu Libya vaukamah a pil niin UN migration agency-in a sawi a, an zinga mi 53 an thi,.
Dam chhuak pahnih hi Nigerian hmeichhia ve ve niin Zirtawpni khan Libyan thuneituten an chhanchhuak tih International Organisation for Migration (IOM) chuan Thawhtanni khan a puang a. Lawngah hian African ram hrang hrang atanga pem leh raltlante an chuang niin an sawi.
Lawngleng hi Libya hmarthlanga vaukam khawpui, al-Zawiya atanga an chhuah hnu darkar ruk velah a pil a ni.
IOM chuan kum 2026 chhung hian Libya atanga Mediterranean Sea kâna pem tum mi 500 dawn thi leh chin hriat loh an awm tawh tih a sawi.
Kum 2011-a hun rei tak roreltu, Muammar Gaddafi-a thah a nih hnuah khan Libya hi sub-Saharan Africa an tih ram atanga Europe-a pem tumte kalkawng ber a ni.
Dam chhuakte hian Tripoli khawthlang, al-Zawiya hi Ningani zan dar 11:00 velah lawngleng, rubber dinghy an tih hmangin an chhuahsan a, Zirtawpni zing lamah Zuwara hmar lamah tawhsual an tawk ta a ni tih IOM an hrilh.
An chanchin hriat lohva rei tak an awm chhan erawh hriat a ni lo.
IOM hian January thlaah bik khan Mediterranean lailiah pem tum mi 375 thi leh chin hriat loh an awm niin an sawi a, a tak takah an zat phei chu hei aia an tam an ring.
A kawng hi hlauhawm hle mah se pem tumte chuan kân an tum an thulh phah chuang lo.
Libya-a awmte hi an dinhmun a chhe hle a. UN human rights thuneitute chuan sawisak, mihringa sumdawn, hna thawka inchhawr luih, thil neih inlaksak a tam a, hei hi sorkar leh mi dang, hel pawl pawhin an ching niin an sawi.
IOM chuan ram dangte chu tangruala mihringa sumdawnna titawp tura hma la tur leh tuipuia pem tum thi tam lutuk pawh an tlem theih nan a kawng him zawk siamsak turin an ngen reng.