Aizawl: All India Congress Committee (AICC) huaihawta Thawhlehnia ram pum huapa MGNREGA thlak danglam duh loh lantirna an buatsaih bawhzuia Hnahthiala hun hman chu MPCC Adviser Zodintluanga Ralte-in a hmanpui a. ZPM chu sawhthing avanga sorkar an nih ang bawkin sawhthing avang bawkin an tla leh dawn tih a sawi.
MPCC adviser chuan sorkar laipuia Congress-in rorelna a chelh laia kuthnathawktu, thingtlang mite tana kum khata ni 100 inhlawhna an siam chu BJP sorkarin tihtawp tumin thiam takin a hming thlak ang leka lang siin hma a la zel tih a sawi a. He dan thar hi ZPM hian a dodal ngam lo va, MNF pawhin engmah an sawi lo, MPCC hi BJP kalphung leh thiltih dan sawisela lungawi lohna lantir ngam leh thingtlang mite thlavang hauh ngam awmchhun an nih thu a sawi.
MPCC Adviser chuan ZPM chu sawhthing avanga sorkar an ni a, sawhthing avang bawkin an tla leh dawn tih sawiin, “KG-ah Rs 50-in kan lei dawn an ti a, an lei fumfe theih leh tak loh avangin tunah hian khawchhak tlangdunga a chingtute chuan vai hnenah Rs. 30-in an hralh mek, anmahni avanga sawhthing chingtu lo neitute chuan sorkar thu hi an ring ngam tawh lo,” a ti.
“An insawi ang chuan a leite chu an lei ve ngei a; mahse vawi khat an leinaah pawh khan corruption a tam em em a, nuai 100 tel a chingpen a, agriculture minister ngei pawhin thil dik lo tam tak a awm a ni tiin a puang tawp a, sawi fel ngaihna pawh a hre lo,” tiin ZPM sorkarin sawhthing an lei dan chungchangah thil felhlel tak awma a hriat thu a sawi bawk.