Indonesia chu Gaza-a sipai 8,000 dah turin an inruahman mek a, nikuma US rawtna anga inkahhai inremna siama a thawh hnihna kalpui meka sipai thawh tur ram hmasa ber an ni.
Army chief of staff, General Maruli Simanjuntak-a chuan sipaiten training an tan tawh a, Gaza-ah hian damdawia inenkawlna leh engineering lam khawih bik an tum tih a sawi.
Indonesia hi thla hmasaa President Donald Trump-a’n Board of Peace a siamah khan an tel a ni.
United Nations Security Council-in International Stabilization Force (ISF) dah tur hian a pawmpui a ngai a, heng sipaite hi Gaza ramri vengtu tur niin Hamas tela sipai awm lohna a nihna vawng himtu tur an ni.
Board hi a vawi khat nan Washington-ah February 19 hian an thukhawm dawn a, Gaza-a Palestinian sorkar leh indona avanga chhia tun din lehna an ngaihtuah dawn a ni.
Indonesian sipaiten Gaza-a an luh hun tur leh an tih tur chiah hi tihchian a la ni lo va; mahse, President Prabowo Subianto-a chuan tirh ngei turin thu a titlu tawh.
Trump-a Board of Peace-a an tel hi Indonesia-a Islam pawl tam tak chuan an sawisel a, Israel-in Gaza a beiha US a inrawlh danah vantlang an thinrim hle.
Hetih lai hian Prabowo-a chuan khawvela Muslim cheng an tamna ber, Indonesia chu Gaza a ngialngheh nan a chet a ngai niin a sawi ve thung a, an tel ve chu Israeli-Palestinian buaina kara ram pahnih a awm theihna tur zawka tangkai a ni thei tih a sawi.
Israel-a sorkar thupuanna, Kan chuan Gaza chhim lam, Rafah leh Khan Younis inkar chu Indonesian sipaiten sipai sang tel an dahna tura barrack siam nan an ruahman fel tawh niin a puang.
Muslim ram dang, Turkey leh Pakistan te pawhin sipai thawn hi an tum nia hriat a ni a; mahse, muanna vawng himtu atan chauh tur niin Hamas-te ralthuam tuntirna tura inrawlh an tum lo nia sawi a ni.
Hamas hian Israel-in Gaza hmun thenkhat an la luah chhung chu ralthuam tun an duh lo va, ram dang sipaiten muanna an vawn him theihna tura rawtna hi a tak takah an la pawm thei lo.