Aizawl: ZPM Consultant Er. C. Lianlunga leh ZPM Gen. Hqrs. Secretary rualten Nilaini khan Sairang atanga Vairengte inkar kawng siam that hna an en a. Contractor pathumte chuan kawngpui siam that hna April 30, 2026-a zawh hman an inrin thu an sawi.
Kawng siam that hna ennaah hian Ministry of Transport & Highway hnuaia awm NHIDCL leh an hnuaia thawk contractor pathum – Balaji, BR Goyal leh J. Infratech Private Limited (Jandu) ten an hmachhawp leh harsatna an thlen.
Mizoram mipui chak lakna kawngpui pawimawh ber siamthat hna hi kumin April 30 hian contractor pathumte hian zawh hman an tumin, zawh hman ngei an inrin thu sawiin, “Vawiin atangin Buichali atanga Sairang Zero Point kawng thuam thlenga cement concrete-a chhun hna bik meter 820 hna hi contractor Jandu hian an tan a. A khuar hnawh hna thawk mekin, km 11 resurfacing, leh bitumen concrete chulmam hna hi April 30, 2026-ah zawh tum a ni,” tiin NHIDCL Project Manager Saksham Tyjia chuan a sawi.
“Kum danga fur ruahtui tlak laia kan ‘life-line’ pawimawh ber chhiat avanga harsatna kan tawh ang te kuminah tawh kan tum tawh lo a. Thawktute harsatna te a hmunah kan enpuiin kan ngaithla a, April 30, 2026-a zawh an tum ang ngei hian an zawh hman ngei kan beiseipui a ni,” tiin ZPM Consultant Er. C. Lianlunga chuan a sawi.
Kawnpui khawchhung Aizawl chhuah lama kawng chhia leh khu lutuk chu Kawnpui VC ten thu lo thlenin, NHIDCL leh contractor te nen sawiho nghal a ni a. A khu leh tlan harsa zualpui chu hnawh nghal turin contractor ten hma an la nghal dawn a ni.
Buichali leh Khamrang inkara Jandu ten Hot Mix Plant an bun chu Mizoram Pollution Control Board (MPCB) ten an endik tawh tih an sawi bawk.