Mizoram Journalists’ Association (MJA) member-te Delhi khawpui hmun hrang hrang tlawha Press Tour-a kal turte chu nimin khan IPRP&S Minister B Lalchhanzova’n a vai liam.
I&PR Director Room-a I&PR Director K Vanlalsangi kaihhruaia vai liamna hun tawi neihah IPRP&S minister chuan zin chhuak turte chu Mizo tana ambassador, Mizo hmel lanna an nih bakah Mizo mipuite tan pawha Mizoram pawn thlirna mit an ni tih sawiin, press tour chu inzir zaunan leh ram tana hlawkna hawn thei tura hmang turin a chah a. Hmun dangah pawh press tour la neih zel tura ruahman a nih thu a sawi bawk.
MJA President C. Lalrambuatsaiha pawhin press tour lo neih tawh thin a nih dante leh minister chak tak hnuaia neih a ni leh thei chu lawmawm a tih thu a sawi a. Zin turte chu tluang taka an hun hmang tura duhsakna hlanin hotute zahngai turin a chah bawk.
February 11-17, 2026 chhung hian Delhi-a Press Tour-a zin tur MJA member pariat leh I&PR Directorate aiawh pahnih an tel a ni.