Lok Sabha Leader of Opposition Rahul Gandhi-a chuan sorkar laipui leh Prime Minister Narendra Modi-a chu India-US trade deal chungchangah nasa takin a sawisel.
“Thil ngaihven ngai tak chu prime minister hian thil pangngai mai mai hnuaiah chuan India hi a hralh lo vang tih ka ring,” tiin parliament rorelnaah a sawi.
“A pawimawh lai tak chu Pu Modi-a pawh telin, Indian prime minister-te hian US-India inremna hi an siam ka ring lo,” tiin Gandhi-a chuan a sawi.
Congress hruaitu hian India chu ‘chhiah hmangin phuar a ni a, kan data hlan vek an ni a, digital trade rule zawng zawng pawh kalsan vek a ni’ tiin a sawi a. “Tual chhungah data engmah a awm lo va, a thlawnin US-ah a luang lut vek a, engmah phalrai danna tur aawm lo va, chhiah kum 20 awl a ni dawn bawk a. Kan thil hlu zawng zawng hi kan hlan vek a ni,” a ti.
“Kan lo neitute chungah khawngaihna nei miah lovin chet a ni a, US lama mite tan erawh thil lawmawm tawp siam a ni thung a. Kan textile pawh tihriral a ni ta a. Bangladesh hian he kan industry hi min ei ralsak vek dawn a. Kan energy security pawh hlan a ni a. Tuialhthei pawh kan lei thei lo… Indian prime minister tumahin hetiang hi an ti ang tih ka ringthei lo. Engmah tihchhan tur a awm lo. Kan inpumpek tawp a ni ber mai,” tiin India leh US-in tun hnaia sumdawnnaa inremna tur an siam, ziah fel mai tur chungchang chu Gandhi-a hian ram rorelna inah a sawi a ni.
Gandhi-a hian US President Donald Trump-a nena indawr laia a pawimawh ber chu Indian data a nih thu a sawi a. “Nang (Trump)-in dollar vawn him i duh a, kan thian tha i ni a. Kan fak em em che a, dollar humhim i tumnaah pawh kan pui dawn che a ni,” tiin tihelna tawngkam a hmang a. “A pahnihnaa kan sawi duh chu President Trump-a a ni a, heng data-te hi neih i duh chuan i chhiahhlawh ang ni lovin, i tlukpuiin min bia ang che,” a ti bawk.
“A dawt letah chuan Pu Trump, lo hrethiam la. Kan energy security hi kan energy security a ni. A dawt lehah chuan nangmah vote-tu tam ber che hi lo neitu a ni tih kan hria a; mahse, keini pawhin kan lo neitute hum ve kan duh a. Ka sawi duh ber chu INDIA tangrual sorkar a din hunah chuan kan data sawi hi kan chakna pui ber a ni dawn a. Kan intluk tawh ang a, Pakistan tluk lekah kan awm lo vang,” a ti.
Tun hnaiah India leh US hian sumdawnnaah inremna tur duan pawmin ziah fel tep a ni tawh a, hei hi lo neitu leh eptu, a bikin Congress chuan an sawisel nasa a. Lo neitute hian an tana hamthatna tur tam tak chu US lo neitute tak a kal dawn niin an ngai a ni.