Aizawl : MNF party-in Mizoram Independence puan kum 60 tlin an lawm dawn.
Ningani khan MNF Hnam Run-a President Chamber-ah Mizoram Independence puan kum 60 tlin lawmna tura Organising Committee chu an Chairman Dr. R. Lalthangliana, MNF Sr. Vice President hovin an thukhawm a, Mizoram independence puan kum 60 tlin lawm an rel.
Thutkhawma an rel danin, Diamond Jubilee ni tak chu Pathianni a nih avangin a lawm tanna hun, March ni 2-ah Aizawl Vanapa Hall-ah ropui taka hman tan turin an ruahman a. Hemi bakah hian MNF Sub-Headquarters, District Headquarters, Block leh Unit hrang hrangah te an remchan dan anga hmang tura ruahman a ni bawk.
Diamond Jubillee lawmna hi March ni 2-a tanin, March ni 2, 2027-ah a kharna hun ropui taka hman tura ruahman a ni bawk.
Thutkhawm kaihruaitu Dr. R. Lalthangliana chuan, zalenna famkim Mizoten an neihna tura hnam pasalthaten sulhnu an hnutchhiah hi kalsan a thiang lo a, bul lo tan a nih tawh angin thangtharten a mei mit loh nan an chhawm nun zel a tul takzet tih a sawi.