Aizawl : JP Career Point Coaching Centre Zarkawt, Aizawl chuan Nilaini zan khan tun hnaia Mizoram Public Service Commission (MPSC)-in Mizoram Combined Civil Services Exam (2025) result a tihchhuah taka an zirlai tling thar te chawimawina hun Hotel Regency Conference Hall, Zarkawt ah an hmang.
He hunah hian School Education Minister Dr. Vanlalthlana chuan khuallian niin a hman pui a. JP Career Point Director Israel Lalremruata’n an coaching dinchhan, kalphung leh Prelims atanga Mains exam report tlangpui a pe a. JC Ramthanga, Ex-Chairman MPSC in fuihna thu sawiin an telpui bawk.
Tun hnaia Mizoram Combined Civil Services Exam (2025) result chhuakah JP Career Point atangin MCS pali, MPS pathum, MIS pahnih leh MF&AS pakhat, an vaiin mi 10 an tling thar a ni.
JP Career Point hi kum 2013-ah din niin, state danga coaching centre tha ber ber te el pha turin state pawn atangin faculty tawnhriat nei tha an chah lut thin a ni.