Aizawl : School Education Minister Dr Vanlalthlana hovin nimin khan School Education Department Officer ten Review Meeting vawi 7-na, MINECO Secretariat Conference Hall-ah neih a ni. |hutkhawmah hian zirtirtu zingah marksheet leh certificate nei felfai lote chhui zuia, a tul anga action lak an sawi.
School Education Minister Dr Vanlalthlana chuan, review meeting neih thin chu a tangkai thu leh thutlukna siam nan a that thu a sawi a, officer-te chu kawng hrang hranga tan la turin a fuih.
School-a thawkten Vidya Samiksha Kendra (VSK) a attendance pek that a ngaih thu sawiin Dr Vanlalthlana chuan, “Online-ah hnathawh hi hmuh theihin awm se, a duh apiangin an lo hmu thei dawn a, hnathawh tha lo a veng dawn a ni,” tia sawiin, VSK hmang hian an hnathawh theih chin hi nawr san theih a nih thu te, Google map update lote chu an grant dawn turte hmun danga pek leh mai thlenga hmalak a tul thu a sawi.
LDC indaih lohna awm chu sorkarin lak phalna a pek tawh chin bakah dil belh leh tum a nih thu te, Exam Centre school-te mamawhna pawh phuhruk theih beisei a nih thu te an sawi a. Zirtirtute zingah marksheet leh certificate nei felfai lo an awm thu report a ni a, hengte hi chhui zuia a tul anga action lak tura sawi a ni.
Thutkhawmah hian zirlaibu thar buatsaih a nih dan te leh zirlaibu thar chu tuna hman lai nen a danglam dawn thu te sawi a ni a, naupangte chu by-heart ringawt lo va, chik zawka zirtir dan tur te, milem te, drama leh field trip a tam thu te, naupangte chu an tawnhriat hmangte leh zawhna zawt thiam tura chher tum a nih dan te sawi lan a ni a. Class V & VIII ten tun promotion exam atang hian zawhna inang an chhan dawn thu te leh school 770-ah he zawhna thar hi an exam dawn thu te leh result hi SCERT ah lakkhawm a nih tur thu te sawi a ni bawk.