India chuan Rs vaibelchhe 18,662 senna tur, tui chhunga a ruala lirthei pali tlan theihna tur kawngpui siamna tur a pawm ta a. Assam-a Bahmaputra lui chhunga rel pawh tlan theihna tur kawngpui, Gohpur leh Numaligarh inkara siam tur hi India-a a hmasa ber tur a ni ang.
Numaligarh-a National Highway 715 leh Gohpur-a NH-15 hi a thui zawng chu 240 a ni mek a. He kawngpui hi Silghat-a NH-52 bula Kaliabhambhora kaltlang niin darkar ruk chhung vel tlan a ni.
Numaligarh, Kaziranga National Park leh Biswanath khua a paltlang bawk.
Cabinet Committee on Economic Affairs chuan four-lane, access-controlled greenfield road siamna tur hi Inrinni khan a pawm tih road transport & highways ministry-a engineering-procurement-construction (EPC) model chuan a sawi.
Kawngpui thar hi siam zawh a nih hunah chuan India-a tui hnuaia rel leh lirthei tlan theihna hmasa ber a ni ang a, khawvelah pawh a pahnihna a ni dawn.
Assam, Arunachal Pradesh, Nagaland bakah hmarchhak state dangte pawhin an chhawr tur a ni dawn a. Bungraw phurtute awlsam zawkin an kal thei dawn a, a phurh man nasa takin a tlahniam ang a, nunphung leh eibar nasa takin a titha thei dawn a ni.
Assam-ah phei chuan eibar, khawtlang nun leh bungraw phurhnaah a tha zawngin nghawng a nei hle tura ngaih a ni.
Hna zawh a nih hnuah chuan hmarchhak pum tan eibara thanna, inkalpawhna kawng awlsam, eibar zawnna hmunpuite inpawhna awlsam zawk leh sumdawnna kawng thar hawnna a ni tel dawn a. Industry thanna atan pawha tangkai tur a ni thei.
Pathianni khan Prime Minister Narendra Modi-a chu India hmarchhaka emergency landing field (ELF) hmasa berah C-130J thlawhna hmangin a tum a. Chabua airfield atanga thlawk chhuakin Moran-a ELF-ah tumpui a ni.
Dibrugarh-Moran inkar kawngpuia ELF siam hi a chhan pakhatah China a tel a. Thenawm ram nena inbakkaih a awm thutah pawh Indian Air Force (IAF) indo thlawhna leh an bungraw phurte chu a tul dan azirin an tum thei tawh dawn a ni.