Aizawl: Mizorama Valentine’s Day-a puala thisen pek rûnpui neih thin chu Inrinni, February 14 khan Aizawl leh district khawpui dang thenkhatah huaihawt leh a ni a, unit 528 pek a ni.
Kumina V-Day puala thisen pek rûnpui huaihawtna pui ber chu Dawrpui Multipurpose Hall-ah neih a ni.
ZMCH Blood Bank-ah leh district dang thenkhata district hospital-ahte pawh huaihawt a ni a. Dawrpui Multipurpose Hall-a V-Day Blood Donation Camp-ah hian chawhma dar 10:30 atangin thisen pek tan a ni a. Chawhnu dar 1-ah function tawi tê hman a ni a, MLA Jeje Lalpekhlua chu khuallian a ni.
V-Day puala thisen pek hi kum 2010 khan Zikpuii Pachuau hmalaknain “Blood for your Valentine” tih thupuia hmangin neih tan a ni a, kum 2012 atangin Zikpuii leh AVBD-ten a huhoin an buatsaih a, 2013 atangin AVBD-in a kutken tan a, AVBD mai ni loin MSACS nen thawk hoin district dangah te pawh tih tan a ni a, thupui atan ‘Show Love, Give Blood’ tih hman tan a ni.
Kumina V-Day Blood Donation Camp hi AVBD, MSACS, NHM leh blood bank tangrualin an huaihawt a ni a, a vawi 17-na a ni a. Mizoramah 2010-2025 chhung khan V-Day pualin thisen unit 11,621 pek a ni.
Inrinnia V-Day puala thisen pe apiangte hi tunlaia thalaite lawm -Frankie Khiangte, Mizo Film Award hnuhnung bera Best Actress dawngtu Rosy Lalramthlengi, filmstar leh zaithiam Vanlallawmawmi te an ni.
Mizoram hi V-Day puala thisen pek rûnpui huaihawt hmasa ber niin hriat a ni a; India ramah chuan a hmasa ber ni ngeia hriat a ni.