Aizawl: Aizawla Bungkawn veng thalaite chuan an venga CID tlang chu tun hmaa a hming, ‘Dokhama Tlang’ tih puttir leh ngei an tum thu sawiin CID thawkte pisa kai tur hmuh turin chhuak tura an duhna thuziak an pho lang.
Bungkawn veng thalaite hian kum tam tak kalta an pi leh pute hma lo lak tawhna, CID tlang chu an veng mipuite tana insawi zawi nan leh an tu leh fate lo awm tur tana hmuhma tha tak neih nan an duh avangin CID-te chu chhuak turin an phut thu an ziak a ni.
An hma laknaah hian politic a tel loh thu sawiin political party-te chu remchang lo zawng lo tura an duh thu an sawi a. CID tlang chu vantlang kuta a luh theihna turin rei tak hma an lo tawh a, home minister an hmuh tawh thin thu leh tun hnaia chief minister hmuh tumna lehkha an thehluh chu pawmpuina an hmuh loh avanga muanawm taka an duh ang ngeia veng tana hman tangkai an duhna tilang tura pungkhawm an nih thu an sawi bawk.
He hmuna building-te chu a hlui tawh avanga sak that tur leh sak that tawhte an nih thu an sawi a, sak that vek a nih chuan an chan loh mai hlauvin an khawtlang hruaitute tha tichak turin buaina siam lo zawngin hma an la tih an sawi.