Press Information Bureau (PIB) buatsaiha press tour neia Kashmir-a cham mek Mizoram Journalists’ Association (MJA) member-te chuan nimin khan Srinagar khawpuia Directorate of Handicraft & Handloom leh Indian Institute of Carpet Technology hmunhma te an tlawh.
Directorate of Handicrafts & Handloom an tlawhnaah MJA member-te hi Director Mussarat Ul Islam hovin lo dawngsawngin department hmalakna leh hnathawh mekte an inhrilhfiah a ni.
Ul Islam chuan Jammu & Kashmir hian kutthemthiamna kawngah an hnathawhte chu khawvel huap pawha an hlawhtlinpui leh an larpui tih a sawi a. Sorkar hnuaiah chauh ni lovin mi malin nasa takin hna an thawk tih an sawi a, eizawn nan mai ni lovin hmingthan nan pawh an hmang a ni tih an sawi.
Director sawi danin, J&K-ah Handicrafts & Handloom department chu Agriculture & Allied sector dawtah state GDP thawhhlawk ber niin zaa 80 a thawk chhuak a. Khawvel pumah khawpui 65 chu World Crafts Council (WCC) in World Craft City atan a lo puang tawh a. Chung zingah Srinagar pawh a tel a. Chubakah, UNESCO-in Creative City in Cratfs & Folk Art atan Srinagar hi a puang tawh bawk.
Mizoram chanchinbu mite hian Indian Institute of Carpet Technology, Srinagar an tlawh bawk a. IICT hotute hian lo dawngsawngin, an hnathawhna hmuna an hnathawh dan leh zirna an kalpui dan hmuh turin, an lo hrilhfiah a. India rama traditional handicrafts Geographical Indication (GI) tag laboratory awmchhun, Pashmina Testing & Quality Certification Centre (PTQCC) an fanpui bawk.
Press tour-ah hian PIB, Aizawl Head of Office Rajeev Laurembam hoin Aizawl leh district hrang hranga MJA member 13 an tel a, Kashmir-a hmun hrang hrang an tlawh kual mek a ni.