Mizoram Legislative Assembly 9-na thutkhawm vawi 6-na leh Budget Session ni bawk chu Thawhlehni khan Legislative Assembly House, Aizawlah tan a ni a. Larsap General (Dr) Vijay Kumar Singh, PVSM, AVSM, YSM (Retd) chuan telpuiin thu a sawi.
Larsap chuan Mizoram chuan remna leh muanna a chhawmnung zel tih sawiin, “Sum leh pai dehchhuah kawngah pawh hma sawnin hmasawnna rahbi a zawh mek zel a ni,” a ti a. Langtlang leh mawhphurhna la ngam din turin sorkarin theihtawp a chhuah tih a sawi a. Agriculture leh a kaihhnawih, hmasawnna ruhrel din leh thil siamna industry hlawk tur din kawngah sorkarin hma a la zel tih a sawi.
Kutthemthiamna, entrepreneurship leh infiammna hmanga thalaite thuam chak leh intodelha siam chu sorkar ngaih pawimawh zinga mi a nih thu a sawi bawk.
Mizoram Legislative Assembly rorelna kalphung zahawm tak vawnhim kawnga sulhnu duhawm tak neih tawh thin chu chhawmnung zel turin member-te a sawm a. Sorkar hmalakna, hmachhawp leh ngaih pawimawh hrang hrangte a tar lang.
Larsapin a tar lan dan chuan sorkar flagship programme Bana Kaih chuan Phase II thleng tawhin CM Special Package atana bithliah chin pawh mipuite tana awlsam zawk nan Rs 50,000-ah tihhniam a ni a. September 13, 2025-a prime minister-in a hawn, Bairabi-Sairang rel kawng thar chuan Aizawl chu India railway map-ah a chuantir a, hmasawnna a thlen a ni.
Mizoram chu India-a ziak leh chhiar thiam kim vekna state hmasa ber atan May 20, 2025 khan puan a ni tih a sawi.
Dan leh thupek kenkawh kawngah harsatna lian tham a thleng lova, ruihhlo Rs. vaibelchhe 1,047 chuang hu man a ni a. Mizoram Liquor (Prohibition) Act, 2019 siam thatna leh dan thar hnuaiah nikum December thla thleng khan thubuai 4,915 ziah luh niin mi 4,532 man an ni tih a sawi.
Lengpui Airport terminal chei that hna 99.20% zawh tawh niin PHE Department hnuaiah division thar pahnih leh sub-division thar panga siam a ni tih a sawi a. NABARD sum Rs. vaibelchhe 74.92 senga siam 10 MW Thenzawl Solar Plant chu December 20, 2025 khan hawn a ni a, 24 MW Tuirini Small Hydel Project siam hna pawh kalpui mek niin a hun taka electric bill pek avangin Rs. vaibelchhe 4.28 laia hniamsak a nih thu a sawi bawk.
Mizoram chuan Ayushman Card 100% tuam chhuakin hei hian chhungkaw nuai 2.22 leh mi nuai 5.91 te a huam a. Ruihhlo ngaite enkawlna, Huhliap Short Stay Centre-ah batch ruk lutin mi 1,488 enkawl an ni tawh a, Jordan Centre chu Mizoram Synod kutah hlan a ni tih a sawi.
Digital lama hmalak that avangin ICT Department-in DigiLocker Accelerator Award’ a dawng tih larsap chuan sawiin Mizoram chuan hmarchhak state-a telecom huangah hma la tha berin tele-density 112.10 a nei tih a sawi.
Aizawl leh district khawpuiah eirawngbawlna gas kawtkaia sem a ni a. April-December, 2025 chhungin Mizoram tlawhtu khualzin 6,79,607 an awm a, heng zinga 9,606 hi ram dang mi niin, Mizoram chu hmarchhak state-a khual hip chak ber a ni tih a sawi bawk.
Empowering Mizoram Sports hmalakna hnuaiah Olympics Games tinzawnin infiamna huang riat thlurbing a ni tih a sawi a, Mizoram chuan January 15, 2026 khan Best Upcoming State Promoting Sports & Physical Education lawmman dawngin India Skills Northeast Regional Competition 2025-26-ah pawh a ti tha ber bawk tih a sawi.
Kum 3 chhunga mi 360 te Artificial Intelligence lama tuaihriam turin IndiaAI nena thawk dunin Data & Artificial Intelligence Laboratory siam mek a ni a. Mizoram chu hmarchhak state-a property card sem chhuak hmasa ber niin Aizawl district-ah 4,041 pek chhuah tawh a ni a, Saitual, Kolasib leh Khawzawl chhunga khaw 71 tan property card 10,401 siam mek a ni tih a sawi bawk.
Sorkar kum kal mekah job card neite tan chawh rualin ni za inhlawhna 57.59 siam tawh niin, ‘Project Rotling- Hmasawnna Rahbi Thar’ hnuaiah zokhaw hmasawnna project 15 kalpui mek a ni a. Pradhan Mantri Awaas Yojana – Gramin hnuaia in sak tura ruahman 29,967 zinga 25,303 zawh niin, Panchayat Bhavan thar 30 sak mek a ni ih a sawi.
District tina khaw pakhat talah ‘Digital Crop Survey’ kalpui tura tih chu tha taka bawhzui a nih avangin Mizoram chuan Rs. vaibelchhe 60 a dawng dawn tih a sawi a. Kum 2025-26 chhungin oil palm chingtuten 5599 MT tharin Rs. nuai 792.45 an la lut niin a sawi.
RCS Mizoram portal chu February 3, 2026-ah hawn niin RCS Office computerization bikah Mizoram chu India-a ti tha berte zingah a tel pha niin larsap chuan a sawi.
Budget Session hian February 17, 2026 atanga March 16, 2026 thleng a awh ang.